തിരുവനന്തപുരം: വിമാനത്തില്വെച്ച് മദ്യലഹരിയില് യുവതിയോട് മോശമായി പെരുമാറിയ യുവാവിന്റെ മൂക്കിടിച്ച് പരത്തി ഭര്ത്താവ്. യാത്രക്കാരന് നാവായിക്കുളം സ്വദേശി രമേഷ് കുറുപ്പിനാണ് യുവതിയുടെ ഭര്ത്താവില് നിന്നും ഇടി കൊള്ളേണ്ടിവന്നത്. മദ്യപിച്ച് പ്രശ്നമുണ്ടാക്കിയ ഇയാളെ സി.ഐ.എസ്.എഫ്. പിന്നീട് പിടികൂടി. മസ്കത്തില് നിന്നു വ്യാഴാഴ്ച തിരുവനന്തപുരത്തേക്കു വന്ന എയര് ഇന്ത്യ എക്സ്പ്രസ് വിമാനത്തിലാണ് സംഭവം ഉണ്ടായത്.
വ്യാഴാഴ്ച വൈകീട്ട് ആറ് മണിയോടെയായിരുന്നു സംഭവം. അടൂര് സ്വദേശിനിയായ യാത്രക്കാരിയോട് രമേഷ് മോശം പരാമര്ശം നടത്തുകയും ഉപദ്രവിക്കുകയും ചെയ്തു. തൊട്ടടുത്തുണ്ടായ ഭര്ത്താവ് ഇയാളെ പിടിച്ച് മാറ്റിയെങ്കിലും വീണ്ടും ഉപദ്രവിക്കാന് ശ്രമിച്ചതോടെ രണ്ടുപേരും തമ്മില് ഉന്തും തള്ളുമായി. തുടര്ന്ന് അടിപിടിയായി. ഇതിനിടയില് യാത്രക്കാരിയുടെ ഭര്ത്താവ് രമേഷിന്റെ മൂക്കിനിടിച്ച് പരിക്കേല്പ്പിക്കുകയായിരുന്നു.
