അടൂർ : ദീർഘകാല സ്വപ്നമായിരുന്ന സ്വന്തമായൊരു വീട് എന്ന ആഗ്രഹം ഒടുവിൽ സഫലമായി. അടൂർ ഗവൺമെന്റ് ബോയ്സ് ഹയർ സെക്കൻഡറി സ്കൂളിലെ ഒരു വിദ്യാർത്ഥിനിക്കായി കാലിഫോർണിയ ആസ്ഥാനമായ ‘പുണ്യം’ ഓർഗനൈസേഷൻ നിർമിച്ചു നൽകിയ വീടിന്റെ താക്കോൽദാനം ചടങ്ങ് നടന്നു. പുണ്യം ഓർഗനൈസേഷൻ കോഓർഡിനേറ്റർ രഞ്ജു രാജൻ വിദ്യാർത്ഥിനിക്ക് വീടിന്റെ താക്കോൽ കൈമാറി.
കൊടുമൺ പഞ്ചായത്ത് പ്രസിഡന്റ് ഗീതാദേവി ചടങ്ങ് ഉദ്ഘാടനം ചെയ്തു. ബ്ലോക്ക് മെമ്പർ അജി, വാർഡ് മെമ്പർ ഷൈനി തോമസ്, മുൻ ജില്ലാ പഞ്ചായത്ത് മെമ്പർ ടി. മുരുകേഷ്, മുൻ വാർഡ് മെമ്പർ സിനി, പഞ്ചായത്ത് ഡെപ്യൂട്ടി ഡയറക്ടർ രാജേഷ് കുമാർ, സ്കൂൾ എസ്.എം.സി ചെയർമാൻ സുനി മൂലയിൽ, പി.ടി.എ വൈസ് പ്രസിഡന്റ് ജെമിനി, മുൻ അധ്യാപകരായ പ്രതിഭാദേവി, ഡോ. അമ്പിളി, എസ്.എം.സി അംഗം ജോബി എന്നിവർ ചടങ്ങിൽ പങ്കെടുത്തു.
ചടങ്ങിനിടെ പുണ്യം കോഓർഡിനേറ്റർ രഞ്ജു രാജനെയും നിർമ്മാണം നിർവഹിച്ച മാങ്കോട് ശങ്കരമംഗലം കൺസ്ട്രക്ഷൻ ഉടമ ശങ്കറിനെയും ആദരിച്ചു. അധ്യാപകരുടെയും പി.ടി.എ, എസ്.എം.സി അംഗങ്ങളുടെയും ശ്രമഫലമായി സംഘടനയുടെ സഹകരണത്തോടെ വിദ്യാർത്ഥിനിയുടെ ദീർഘകാല സ്വപ്നം യാഥാർത്ഥ്യമായി.
