ചെന്നൈ: ഫെബ്രുവരി 22-നകം പുതുച്ചേരിയില്‍ കോണ്ഗ്രസ് സര്‍ക്കാര്‍ ഭൂരിപക്ഷം തെളിയിക്കണമെന്ന് ലെഫ്.ഗവര്‍ണര്‍ തമിളിസൈ സൗന്ദര രാജന്‍ ആവശ്യപ്പെട്ടു. ഫെബ്രുവരി 22-ന് വൈകുന്നേരം അഞ്ചിന് മുമ്പ് നിയമസഭയില്‍ ഭൂരിപക്ഷം തെളിയിക്കാനാണ് മുഖ്യമന്ത്രി വി. നാരായണ സ്വാമിയോട് ഗവര്‍ണര്‍ ആവശ്യപ്പെട്ടിരിക്കുന്നത്.
നിയമസഭയില്‍ ഭൂരിപക്ഷം തെളിയിക്കാന്‍ മുഖ്യമന്ത്രി വി നാരായണസ്വാമിക്ക്‌ നിര്‍ദേശം നല്‍കണമെന്നാവശ്യപ്പെട്ട്‌ ബിജെപി സഖ്യം രാജ്‌ഭവനിലെത്തി നിവേദനം നല്‍കിയിരുന്നു. പ്രതിപക്ഷ നേതാവ്‌ എന്‍ രങ്കസ്വാമിയുടെ നേതൃത്വത്തില്‍ പതിനാല്‌ എംഎല്‍എമാര്‍ ഒപ്പിട്ട കത്ത്‌ ലെഫ്. ഗവര്‍ണറുടെ പ്രതിനിധിക്കാണ്‌ കൈമാറിയത്‌. ഇതിനു പിന്നാലെയാണ് ഗവര്‍ണറുടെ നടപടി.
മന്ത്രിമാരടക്കം നാല്‌ കോണ്ഗ്രസ് എംഎല്‍എമാര്‍ രാജിവെച്ച്‌ ബിജെപിയില്‍ ചേര്‍ന്നതോടെ സര്‍ക്കാരിന്റെ ഭൂരിപക്ഷം നഷ്‌ടമായ സാഹചര്യത്തിലാണ്‌ പ്രതിപക്ഷ നീക്കം. നിലവില്‍ എന്‍ഡിഎ സഖ്യത്തിനും കോണ്ഗ്രസ്-ഡിഎംകെ സഖ്യത്തിനും 14 വീതം എംഎല്‍എ മാരുടെ പിന്തുണയാണ് ഉളളത്. ആകെ 33 സമാജികരുളള പുതുച്ചേരിയില്‍ കേവല ഭൂരിപക്ഷത്തിന് 17സീറ്റാണ് വേണ്ടത്.
