തിരുവനന്തപുരം : പൊതുമരാമത്ത് വകുപ്പ് റോഡുകളെക്കുറിച്ചുള്ള പരാതികള് ഓണ്ലൈനായി അറിയിക്കാന് കഴിയുന്ന മൊബൈല് ആപ്പ് PWD 4U മന്ത്രി മുഹമ്മദ് റിയാസ് പുത്തിറക്കി. നാളെ വൈകുന്നേരം മുതല് ഗൂഗിള് പ്ലേസ്റ്റോറില് നിന്നും ആപ് ഡൗണ്ലോഡ് ചെയ്യാനാകും. ഐ ഒ എസ് വേര്ഷന് പിന്നീട് ലഭ്യമാകും. പൊതുമരാമത്ത് വകുപ്പ് സെക്രട്ടറി ആനന്ദ് സിംഗ് ഐ എ എസ് , ഉന്നത ഉദ്യോഗസ്ഥര് തുടങ്ങിയവര് ചടങ്ങില് പങ്കെടുത്തു.
ആദ്യ മൂന്ന് മാസം പരീക്ഷണ അടിസ്ഥാനത്തിലാണ് ആപ്പ് പ്രവര്ത്തിക്കുക. ഈ പ്രവര്ത്തനം സൂക്ഷ്മമായി നിരീക്ഷിക്കും. അതിനുശേഷം ജനങ്ങളുടെ അഭിപ്രായങ്ങള് കൂടി അറിഞ്ഞ് ആവശ്യമായ മാറ്റങ്ങള് വരുത്തും. പൊതുമരാമത്ത് റോഡുകളെക്കുറിച്ചുള്ള പ്രശ്നങ്ങളും പരാതികളും ഫോട്ടോ സഹിതം ഈ ആപ്പില് അപ്ലോഡ് ചെയ്യാനാകും. പരാതിയുടെ തുടര്നടപടികള് സമയങ്ങളില് അറിയുന്നതിനും ആപ്പ് വഴി സാധിക്കും.
പൊതുമരാമത്ത് റോഡുകളെ കുറിച്ചുള്ള പരാതികള് മാത്രമാണ് ഈ ആപ്പിലൂടെ പരിഹരിക്കാനാകുക. പൊതുമരാമത്ത് വകുപ്പിലെ റോഡുകള് ഡിജിറ്റലൈസ് ചെയ്യുന്ന പ്രവൃത്തി നടന്നു വരികയാണ്. ഡിജിറ്റലൈസ് ചെയ്ത 4000 കിലോമീറ്റര് റോഡുകളുടെ വിവരം ഈ ആപ്പില് രേഖപ്പെടുത്തിയിട്ടുണ്ട്. ഈ 4000 കിലോമീറ്ററിലെ വിവരം അപ്ലോഡ് ചെയ്താല് ഉടന് അത് ബന്ധപ്പെട്ട ഉദ്യോഗസ്ഥന് ലഭിക്കും. 29,000 കിലോമീറ്ററോളം റോഡിന്റെ ഡിജിറ്റലൈസേഷന് പൂര്ത്തിയാക്കാനുണ്ട്. ഇത് നടന്നു വരികയാണ്. ഈ റോഡുകളെ സംബന്ധിക്കുന്ന വിവരങ്ങള് അപ്ലോഡ് ചെയ്താല് കേന്ദ്രീകൃത സംവിധാനത്തിലെത്തുകയും ബന്ധപ്പെട്ട ഉദ്യോഗസ്ഥര്ക്ക് അയച്ചുകൊടുക്കുകയും ചെയ്യും.
കൂടുതല് ജനസൗഹൃദമാക്കുന്നതിന്റെ ഭാഗമായാണ് ആപ്പ് പുറത്തിറക്കുന്നത്. ജനങ്ങളുടെ അഭിപ്രായം കേള്ക്കുകയും പ്രായോഗികമായ നിര്ദ്ദേശങ്ങള് നടപ്പിലാക്കുകയും ചെയ്യുക എന്നതാണ് ലക്ഷ്യം. ഉദ്യോഗസ്ഥരുടെയും ജനങ്ങളുടെ പങ്കാളിത്തവും ഈ ആപ്പ് ലക്ഷ്യത്തിലെത്തിക്കാന് പ്രധാനമാണ്.
