അഞ്ചല്‍: ക്യൂ നെറ്റ് എന്ന സ്ഥാപനത്തിന്റെ പേരില്‍ നടത്തിയ സാമ്പത്തിക തട്ടിപ്പില്‍ അഞ്ചല്‍ മേഖലയിലുള്ള നിരവധിയാളുകള്‍ കബളിപ്പിക്കപ്പെട്ടു. ചാരുംമൂട് ഉമ്പര്‍നാട് മുട്ടത്താന്‍ പറമ്പില്‍ വീട്ടില്‍ സലേഷ് (30) മാവേലിക്കര പോലീസിന്റെ പിടിയിലായതോടെയാണ് പരാതിക്കാരുടെ എണ്ണം വര്‍ധിച്ചത്. ക്യൂനെറ്റ് മാര്‍ക്കറ്റിങ് ബിസിനസില്‍ പങ്കാളിയാക്കാമെന്നും മികച്ച ലാഭം വാഗ്ദാനം നല്‍കിയുമാണ് തട്ടിപ്പു നടത്തിയത്.
ആലഞ്ചേരി, അഞ്ചല്‍, തേവര്‍തോട്ടം, ഇടയം എന്നീ സ്ഥലങ്ങളിലുള്ള ഇരുപത്തിയഞ്ചോളം പേരാണ് പരാതിക്കാരായി എത്തിയത്. ഇരുപത്തി അയ്യായിരം മുതല്‍ ഒരു ലക്ഷം രൂപവരെ പണം നഷ്ടപ്പെട്ടിട്ടുള്ളവരാണ് ഇവര്‍. കൂടുതല്‍ പരാതികള്‍ക്ക് സാധ്യതയുണ്ടെന്ന് പറയപ്പെടുന്നു. അടുത്ത ബന്ധുവിന്റെ പരാതിയെത്തുടര്‍ന്നാണ് സലേഷിനെ പോലീസ് അറസ്റ്റ് ചെയ്തത്. ഡല്‍ഹി കേന്ദ്രീകരിച്ചായിരുന്നു ഇവര്‍ തട്ടിപ്പ് നടത്തിയതെന്നും സ്ത്രീകളെ ഉപയോഗിച്ചും ഇവര്‍ ഇരകളെ വശത്താക്കിയിരുന്നെന്നും പറയപ്പെടുന്നു.
