ദോഹ : ഭാഗ്യമുദ്രയിലും അറബ് പാരമ്പര്യവും പൈതൃകവുമൊന്നും വിടാതെ 2022 ഖത്തര് ലോകകപ്പിന്റെ ഭാഗ്യമുദ്ര പുറത്തിറങ്ങി. പ്രതിഭയുള്ള കളിക്കാരന് എന്ന അര്ഥം വരുന്ന ‘ലഈബ്’ ആണ് ഇനി ലോകകപ്പിന്റെ ഭാഗ്യവും പേറി കാല്പന്ത് ആരാധകരുടെ ഹൃദയങ്ങളില് പന്തുതട്ടുക. ദോഹയില് വെള്ളിയാഴ്ച രാത്രി നടന്ന ലോകകപ്പ് ഗ്രൂപ് റൗണ്ട് മത്സരങ്ങളുടെ നറുക്കെടുപ്പ് ചടങ്ങുകള്ക്ക് തൊട്ടുമുമ്പായാണ് ഭാഗ്യമുദ്ര പുറത്തിറക്കിയത്. ഖത്തര് ലോകകപ്പിന്റെ ഔദ്യോഗിക ലോഗോയോട് ഏറെ സാമ്യതകള് നല്കുന്നതും മേഖലയുടെ ഫുട്ബാള് മികവ് ലോകത്തിനു മുന്നിലേക്ക് പ്രദര്ശിപ്പിക്കുന്നതുമാണ് ഭാഗ്യമുദ്രയുടെ തീം. യുവത്വത്തിന്റെ ചുറുചുറുക്കും ഉന്മേഷവും സന്തോഷവുമെല്ലാം ഭാഗ്യമുദ്ര വഴി പ്രദര്ശിപ്പിക്കുന്നു.
