ബല്ലാരി : കർണാടകയിലെ ബല്ലാരിയിലെ ഹലകുന്ധി മഠത്തിൽ പുനരാരംഭിക്കുന്ന കോൺഗ്രസിന്റെ ഭാരത് ജോഡോ യാത്ര ഇന്ന് 1000 കിലോമീറ്റർ പിന്നിടും. ഉച്ചയ്ക്ക് 1.30ന് ബല്ലാരി മുനിസിപ്പൽ ഗ്രൗണ്ടിൽ നടക്കുന്ന മെഗാ റാലിയിൽ രാജസ്ഥാൻ മുഖ്യമന്ത്രി അശോക് ഗെലോട്ടും ഛത്തീസ്ഗഡ് മുഖ്യമന്ത്രി ഭൂപേഷ് ബാഗേലും രാഹുൽ ഗാന്ധിക്കൊപ്പം പങ്കെടുക്കും. പരിപാടിയിൽ ജനസാഗരം അണിനിരക്കുമെന്നാണ് സംഘാടകർ അറിയിച്ചിട്ടുള്ളത്.
കന്യാകുമാരിയിൽ നിന്ന് സെപ്റ്റംബർ ഏഴിന് ആരംഭിച്ച 3570 കിലോമീറ്റർ ദൈർഘ്യമുള്ള ഭാരത് ജോഡോ യാത്ര 38ആം ദിവസത്തിലേക്ക് കടക്കുകയാണ്. കർണാടക കോൺഗ്രസ് അധ്യക്ഷൻ ഡികെ ശിവകുമാറും കർണാടക പ്രതിപക്ഷ നേതാവ് സിദ്ധരാമയ്യയും രാഹുൽ ഗാന്ധിയ്ക്കൊപ്പം തന്നെയുണ്ട്. കഴിഞ്ഞ ദിവസം മൂവരും ഒന്നിച്ചു നടക്കുന്ന ചിത്രങ്ങൾ ട്വിറ്ററിലൂടെ പുറത്തുവന്നിരുന്നു.
