പത്തനംതിട്ട : സ്ത്രീത്വത്തെ അപമാനിച്ച രാഹുൽ മാങ്കൂട്ടത്തിൽ എംഎൽഎ സ്ഥാനം രാജിവെക്കണമെന്നും അത്തരക്കാരെ സംരക്ഷിക്കുന്ന പത്തനംതിട്ട ഡിസിസി കമ്മിറ്റി പിരിച്ച് വിടണം എന്നും ആവശ്യപ്പെട്ട് കേരള യൂത്ത് ഫ്രണ്ട് (എം) പത്തനംതിട്ട ജില്ലാ കമ്മിറ്റിയുടെ ആഭിമുഖ്യത്തിൽ പത്തനംതിട്ട ഡിസിസി ഓഫീസിലേക്ക് പ്രതിഷേധ മാർച്ചും രാഹുൽ മാങ്കൂട്ടത്തിലിന്റെ കോലം കത്തിക്കലും നടത്തി. ആരോപണ വിധേയനായ രാഹുൽ മാങ്കൂട്ടത്തിലിന് ഒരു നിമിഷം പോലും എംഎൽഎ സ്ഥാനത്ത് തുടരാൻ അർഹതയില്ല. നിരവധി ആരോപണങ്ങളാണ് ദിനംപ്രതി ഉയർന്നു വന്നു കൊണ്ടിരിക്കുന്നത്. ഇത്തരക്കാരെ സംരക്ഷിക്കുന്ന നടപടിയിൽ നിന്നും കോൺഗ്രസ് നേതൃത്വം പിന്മാറി ഈ നാട്ടിലെ സ്ത്രീ ജനങ്ങളുടെ അഭിമാനം സംരക്ഷിക്കണം.
എംഎൽഎ സ്ഥാനം രാജിവെയ്ക്കാതെ മുൻപോട്ടു പോയാൽ ശക്തമായ സമരപരിപാടികളുമായി രംഗത്തുണ്ടാവുമെന്നും യൂത്ത് ഫ്രണ്ട് (എം) പ്രവർത്തകർ പറഞ്ഞു. കർഷക യൂണിയൻ (എം) ജില്ലാ പ്രസിഡന്റ് ജോൺ വി തോമസ് പ്രതിഷേധ മാർച്ച് ഉദ്ഘാടനം ചെയ്തു. യൂത്ത് ഫ്രണ്ട് (എം) ജില്ലാ പ്രസിഡന്റ് മാത്യു നൈനാൻ അധ്യക്ഷത വഹിച്ചു. ഹാൻലി ജോൺ, റിന്റോ തോപ്പിൽ,അഭിജിത് വിഷ്ണു, അനുപ് സി ആർ, അഡ്വ. ഷോണു രാജ്, ലിനു കുളങ്ങര, അരുൺ തേക്കിനൽ,വിജീഷ് വള്ളിക്കാല, ഇന്ദ്രജിത് ഇലന്തൂർ, സിജു നാരങ്ങാനം എന്നിവർ പ്രസംഗിച്ചു.
