ദില്ലി; രാജ്യ തലസ്ഥാനം കൊടും ചൂടിലും വായുമലിനീകരണത്തിലും വലയുകയായിരുന്നു. എന്നാല്‍ ഒടുവില്‍ ദില്ലിയ്ക്ക് ആശ്വാസ മഴയെത്തി. ഡല്‍ഹി – എന്‍സിആറിന്റെ ചില ഭാഗങ്ങളിലും അതിനോട് ചേര്‍ന്നുള്ള ഉത്തര്‍പ്രദേശിലും ഇന്നും മഴ പെയ്തു. ഡല്‍ഹിയുടെ വടക്കന്‍ ഭാഗങ്ങളില്‍ ശനിയാഴ്ച വൈകിട്ടോടെ മഴയെത്തി. പല ഭാഗങ്ങളിലും ആലിപ്പഴവും പെയ്തു. മഴയും, മൂടിക്കെട്ടിയ ആകാശവും വെയിലിന്റെ കാഠിന്യം കുറച്ചിരുന്നു. ഇതോടെ താപനിലയിലും കുറവുണ്ടായി. ഡല്‍ഹി, ന്യൂഡല്‍ഹി, തെക്ക്-പടിഞ്ഞാറന്‍ ഡല്‍ഹി (നസഫ്ഗഡ്, ദ്വാരക, പാലം, ഐജിഐ എയര്‍പോര്‍ട്ട്), എന്‍സിആര്‍ (ഗുരുഗ്രാം, മനേസര്‍) എന്നീ ഒറ്റപ്പെട്ട സ്ഥലങ്ങളിലും അതിനോട് ചേര്‍ന്നുള്ള പ്രദേശങ്ങളിലും മഴ ഉണ്ടാകുമെന്ന് കാലാവസ്ഥാ വകുപ്പ് (ഐഎംഡി) പ്രവചിച്ചു.
ഞായറാഴ്ചയും തിങ്കളാഴ്ചയും നഗരത്തില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്. രണ്ടു ദിവസം കൂടി മഴ തുടരുമെന്നാണ് അറിയിപ്പ്. ഞായറാഴ്ച മഴയ്ക്ക് ശക്തി കുറവായിരിക്കുമെന്നും തിങ്കളാഴ്ച ശക്തിയോടെ മഴ പെയ്യുമെന്നുമാണ് പ്രവചനം. പടിഞ്ഞാറന്‍ ഹിമാലയന്‍ മേഖലയിലും പഞ്ചാബ്, ഹരിയാന, ചണ്ഡിഗഡ്, ഡല്‍ഹി, ഉത്തര്‍പ്രദേശ്, രാജസ്ഥാന്‍ എന്നിവിടങ്ങളില്‍ മാര്‍ച്ച് 19, 20 തീയതികളില്‍ ഇടിമിന്നലോടുകൂടിയ കാറ്റും മഴയും ലഭിക്കുമെന്ന് ഐഎംഡി കാലാവസ്ഥാ പ്രവചനത്തില്‍ പ്രവചിച്ചു. മാര്‍ച്ച് 19 മുതല്‍ 21 വരെ ഉത്തരാഖണ്ഡില്‍ ഒറ്റപ്പെട്ട ആലിപ്പഴം പെയ്യാന്‍ സാധ്യതയുണ്ടെന്നും കാലാവസ്ഥാ നിരീക്ഷണ കേന്ദ്രം അറിയിച്ചു.
