കോഴിക്കോട്: കനത്ത മഴയില് കോഴിക്കോട് ജില്ലയില് പലയിടത്തും വന് നാശനഷ്ടങ്ങള്. മാവൂരില് വിവാഹ സല്ക്കാരം നടന്ന ഓഡിറ്റോറിയത്തിലേക്ക് മഴ വെളളം ഇരച്ചുകയറിതോടെ വിവാഹത്തിനായി തയ്യാറാക്കിയ ഭക്ഷണം നശിച്ചു. മാവൂര് ഗ്വാളിയോര് റയോണ്സ് ഫാക്ടറിയുടെ പാര്ശ്വഭിത്തി ഇടിഞ്ഞ് വീണാണ് വെളളം ഒഴുകിയെത്തിയതെന്ന് നാട്ടുകാര് പറയുന്നു. മതില് ഇടിഞ്ഞ് വീണതോടെ കണ്വഷണന് സെന്ററിലെ അടുക്കളയിലേക്ക് കല്ലു മണ്ണും ഒലിച്ചെത്തുകയായിരുന്നു. മാവൂര് പുളിക്കണ്ടി സ്വദേശിയുടെ വിവാഹ ചടങ്ങുകള് നടന്ന് കൊണ്ടിരിക്കുന്നതിനിടെയായിരുന്നു സംഭവം. അടുക്കളയിലും ഭക്ഷണം വിളുമ്പുന്ന ഹാളിലും വെള്ളം കയറി.
കോഴിക്കോട് അടക്കമുള്ള വടക്കന് ജില്ലകളില് ശക്തമായ മഴ തുടരുകയാണ്. വരും മണിക്കൂറിലും മഴ തുടരുമെന്നാണ് കാലാവസ്ഥാ വകുപ്പ് പറയുന്നത്. ഒറ്റപ്പെട്ടയിടങ്ങളില് ശക്തമായ മഴ പെയ്യുന്നുണ്ട്. ഇടുക്കി, തൃശൂര്, കോഴിക്കോട്, വയനാട്, കണ്ണൂര്, കാസര്കോട് തുടങ്ങിയ ആറ് ജില്ലകളില് യെല്ലോ അലര്ട്ട് നല്കിയിട്ടുണ്ട്. അറബിക്കടലിലെ ഇരട്ട ന്യൂനമര്ദ്ദമാണ് മഴ ശക്തമായി തുടരാന് കാരണം. അടുത്ത ദിവസങ്ങളില് മഴയുടെ ശക്തി കുറയുമെന്നും പ്രവചനമുണ്ട്.
