തിരുവനന്തപുരം : കൊടകര കുഴല്പ്പണക്കേസില് ബിജെപി നേതൃത്വത്തെ പരിഹസിച്ച് വിടി ബല്റാം. അയോധ്യ രാമക്ഷേത്രത്തിനായി ഭൂമി വാങ്ങി ഭഗവാന്റെ പേരില് കള്ളപ്പണ ഇടപാട് നടത്തിയവര്ക്ക് കൊടകര കുഴല്പ്പണക്കേസൊക്കെ എന്ത് എന്നാണ് വിടി ചോദിക്കുന്നത്. ഫെയ്സ്ബുക്ക് കുറിപ്പിലൂടെയാണ് വിടിയുടെ പ്രതികരണം.
വി.ടി ബെല്റാമിന്റെ എഫ്ബി പോസ്റ്റ്
അയോധ്യയില് 5.8 കോടിയോളം ന്യായവില വരുന്ന സുമാര് 3 എക്കര് സ്ഥലം ഒരു ദിവസം വൈകിട്ട് 7.10 ന് സ്ഥലമുടമകളില് നിന്ന് വെറും 2 കോടി രൂപക്ക് ചില റിയല് എസ്റ്റേറ്റ് ഏജന്റുമാര് വാങ്ങുന്നു. വെറും 5 മിനിറ്റിനുള്ളില്, അതായത് 7.15 ന് ഇതേ സ്ഥലം 18.5 കോടി രൂപക്ക് റിയല് എസ്റ്റേറ്റുകാര് രാം ജന്മഭൂമി തീര്ത്ഥ് ക്ഷേത്ര ട്രസ്റ്റിന് മറിച്ചു വില്ക്കുന്നു. ഉടന് തന്നെ 17 കോടി രൂപ RTGS വഴി കൈപ്പറ്റുന്നു.
രണ്ട് ഇടപാടിനും സാക്ഷികള് ഒരേ ആള്ക്കാര് തന്നെ. രാമജന്മഭൂമി ട്രസ്റ്റിലെ അംഗം അനില് മിശ്രയും അയോധ്യയിലെ ബിജെപിക്കാരനായ മേയര് റിഷികേശ് ഉപാധ്യായയും. ട്രസ്റ്റിന്റെ ജനറല് സെക്രട്ടറി കൂടിയായ വിശ്വഹിന്ദു പരിഷത്തിന്റെ അഖിലേന്ത്യാ വൈസ് പ്രസിഡണ്ട് ചമ്പത് റായിയുടെ കാര്മ്മികത്വത്തിലാണ് മൊത്തം ഡീലുകള്. ഭഗവാന് രാമന്റെ പേരില്പ്പോലും സാമ്പത്തികത്തട്ടിപ്പും കള്ളപ്പണ ഇടപാടും നടത്താന് മടിയില്ലാത്തവര്ക്ക് കൊടകര കുഴലൊക്കെ എന്ത്!
