തിരുവനന്തപുരം: വനംമന്ത്രി എകെ ശശീന്ദ്രനെതിരെ കോണ്ഗ്രസ് നേതാവ് രമേശ് ചെന്നിത്തല. വനംമന്ത്രിക്ക് സ്ഥലകാല വിഭ്രാന്തിയാണ്. അദ്ദേഹം എന്താണ് പറയുന്നതെന്ന് അദ്ദേഹത്തിന് പോലും അറിയില്ല. മൃതദേഹം വെച്ചുകൊണ്ട് ബിഷപ്പുമാര് മുതലെടുപ്പിന് ശ്രമിക്കുകയാണെന്നൊക്കെയാണ് മന്ത്രി പറയുന്നത്. മയക്കുവെടി വെക്കേണ്ടത് മന്ത്രിയ്ക്കാണെന്നും രമേശ് ചെന്നിത്തല കുറ്റപ്പെടുത്തി.
മലയോര മേഖലയിലെ ജനങ്ങള്ക്ക് വേണ്ട സംരക്ഷണം ലഭിക്കണം. വന്യജീവികള് ഇറങ്ങി ആളുകളെ കൊല്ലുമ്പോള് ജനങ്ങള് പരിഭ്രാന്തരാകില്ലേ. ഇതിനകത്ത് ഒരു രാഷ്ട്രീയവുമില്ല. ജനങ്ങള്ക്ക് സ്വസ്ഥമായി ജീവിക്കാന് കഴിയുക എന്നതാണ് പ്രധാനം. കണമലയിലെ പ്രതിഷേധക്കാര്ക്കെതിരെ രജിസ്റ്റര് ചെയ്ത കേസുകള് പിന്വലിക്കണം. രണ്ടു വിലപ്പെട്ട ജീവനുകളാണ് വന്യജീവി ആക്രമണത്തില് നഷ്ടപ്പെട്ടത്. ഇനിയും വന്യജീവികളുടെ ആക്രമണം ഉണ്ടാകുമോയെന്ന ഭയത്തിലാണ് ഇവിടുത്തുകാര്. അപ്പോള് പ്രതിഷേധം ഉണ്ടാകുക സ്വാഭാവികമാണെന്നും അദ്ദേഹം പറയുന്നു. അതേസമയം കണമലയില് രണ്ടു പേരെ കൊലപ്പെടുത്തിയ കാട്ടുപോത്തിന് നായാട്ടുകാരുടെ വെടിയേറ്റിരുന്നതായി കണ്ടെത്തല്. വെടിയേറ്റ പ്രകോപനത്തിലാണ് പോത്ത് നാട്ടുകാരെ ആക്രമിച്ചത് എന്നാണ് വിവരം. ഇക്കാര്യം വനം വകുപ്പ് ഉദ്യോഗസ്ഥര് പരിശോധിച്ചു വരികയാണ്.
