റാന്നി : പൊതുവിദ്യാഭ്യാസ വകുപ്പ് സമഗ്ര ഗുണമേന്മാ വിദ്യാഭ്യാസ പദ്ധതിയുടെ ഭാഗമായി നടത്തുന്ന ലഹരിവിരുദ്ധ പരിപാടികൾക്ക് ജനകീയ മുഖം നൽകി മാതൃകയായി റാന്നി ബി.ആർ.സി. വിവിധ വകുപ്പുകളുടേയും പ്രാദേശിക സർക്കാരുകളുടേയും സന്നദ്ധ സംഘടനകളുടേയും സഹകരണം ഉറപ്പാക്കിയാണ് പ്രചാരണ പരിപാടികൾ നടുത്തുന്നത്. തോട്ട – വനമേഖലകളിലെ ലഹരിവിരുദ്ധ പരിപാടികൾക്ക് മുന്നോടിയായി ആദിവാസി ഊരുകള് സന്ദര്ശിച്ചു. പെരുനാട് പഞ്ചായത്ത് പ്രസിഡൻ്റ് പി.എസ് മോഹനൻ്റെ നേതൃത്വത്തില് പത്തനംതിട്ട ജില്ലാ ആശുപത്രി ക്ലിനിക്കൽ സൈക്കോളജിസ്റ്റ് പി.ടി.സന്ദീഷും ബി.പി.സി ഷാജി.എ. സലാമും സംഘാംഗങ്ങളായി.
26 ന് എല്ലാ വിദ്യാലയങ്ങളിലും ലഹരി വിരുദ്ധ സ്പെഷ്യൽ അസംബ്ലിയും സുംബ ഡാൻസും നടത്തും. ശാരീരിക- മാനസിക ആരോഗ്യം മെച്ചപ്പെടുത്താനാണ് സുംബ ഡാൻസും ലഘു വ്യായാമങ്ങളും നടത്തുന്നത്. ബ്ലോക്ക്തല പരിപാടി എസ് സി ഹയർസെക്കൻഡറി സ്കൂളിൽ റാന്നി പഴവങ്ങാടി പഞ്ചായത്ത് പ്രസിഡന്റ് റൂബി കോശി രാവിലെ 9 മണിക്ക് ഉദ്ഘാടനം ചെയ്യും. സ്കൂൾ മാനേജർ ഫാ.ജോൺസൺ വർഗീസ് അധ്യക്ഷത വഹിക്കും. ഉപജില്ലാ വിദ്യാഭ്യാസ ഓഫീസർ കെ എസ് ജയന്തി ലഹരി വിരുദ്ധ പ്രതിജ്ഞ വിദ്യാർത്ഥികൾക്ക് ചൊല്ലി കൊടുക്കും.
