റാന്നി: റാന്നി എം.എൽ.എ എക്സലൻസ് അവാർഡ് 2026 – ജൂൺ 27ന് ഉച്ചയ്ക്ക് 2 മണിക്ക് റാന്നി വളയനാട്ട് ഓഡിറ്റോറിയത്തിൽ നടക്കും. റാന്നി നിയോജകമണ്ഡലത്തിലെ എസ്.എസ്.എൽ.സി, പ്ലസ് ടു പരീക്ഷകളിൽ ഉന്നത വിജയം നേടിയ വിദ്യാർത്ഥികളെയും 100 ശതമാനം വിജയം കൈവരിച്ച സ്കൂളുകളെയും ആദരിക്കുന്നതിനായി റാന്നി എം.എൽ.എ അഡ്വ. പഴകുളം മധു സംഘടിപ്പിക്കുന്നതാണ് റാന്നി എം.എൽ.എ എക്സലൻസ് അവാർഡ് 2026. റെയിൽവേ റിക്രൂട്ട്മെന്റ് ബോര്ഡ് മെമ്പർ സെക്രട്ടറി എം.പി.ലിപിൻ രാജ് അവാർഡ് വിതരണം ഉദ്ഘാടനം ചെയ്യും. പത്തനംതിട്ട ജില്ലാ പോലീസ് മേധാവി ആർ. ആനന്ദ് മുഖ്യാതിഥിയായിരിക്കും.
ആർച്ച്ബിഷപ്പ് കുര്യാക്കോസ് മാർ സേവേറിയോസ് അനുഗ്രഹ പ്രഭാഷണം നിർവഹിക്കും. വിദ്യാഭ്യാസ രംഗത്ത് മികവ് തെളിയിച്ച വിദ്യാർത്ഥികളെയും വിദ്യാഭ്യാസ സ്ഥാപനങ്ങളെയും പ്രോത്സാഹിപ്പിക്കുകയും അവരുടെ നേട്ടങ്ങളെ സമൂഹത്തിന് മുന്നിൽ അവതരിപ്പിക്കുകയും ചെയ്യുക എന്ന ലക്ഷ്യത്തോടെയാണ് പരിപാടി സംഘടിപ്പിക്കുന്നതെന്ന് അഡ്വ. പഴകുളം മധു എം.എൽ.എ അറിയിച്ചു. ചടങ്ങിൽ സാംസ്കാരിക പ്രവർത്തകർ, ജനപ്രതിനിധികൾ തുടങ്ങിയവർ പങ്കെടുക്കും.
