റാന്നി : ഏറെ ഇഷ്ടപ്പെടുന്ന ഹെലൻ കെല്ലറുടെയും മലാലയുടെയും ആത്മകഥകൾ പുസ്തകത്താളുകൾപോലെ സ്ക്രീനിൽ വിടർന്നപ്പോൾ കീർത്തനയ്ക്കും കൂട്ടുകാർക്കും കൂട്ടുകാർക്കും വിസ്മയം. അഡ്വ. പ്രമോദ് നാരായൺ എംഎൽഎയുടെ പ്രാദേശിക വികസന ഫണ്ടിൽ നിന്നും 12.5 ലക്ഷം രൂപ ചിലവഴിച്ച് നോളജ് വില്ലേജ് പദ്ധതിയുടെ ഭാഗമായി റാന്നി എം.എസ് എച്ച്.എസ്.എസ് സ്കൂളിൽ ആരംഭിച്ച ഡിജിറ്റൽ ലൈബ്രറിയിലാണ് കുട്ടികൾക്ക് വായന നവ്യ അനുഭവമായത്. ബെന്യാമിന്റെ ആടുജീവിതം മുതൽ ഷേക്സ്പിയർ കൃതികൾ വരെയുള്ള ആറായിരത്തിലധികം പുസ്തകങ്ങൾ വായനയുടെ പുതുവഴികൾ തുടർന്ന് ഡിജിറ്റല് ലൈബ്രറിയിൽ ഒരുക്കിയിട്ടുണ്ട്.
പുസ്തക രചനയിൽ അഭിരുചിയുള്ള വിദ്യാർത്ഥികൾക്ക് എഴുത്തുകാരാകാൻ അവസരം ഒരുക്കി അവരുടെ രചനകൾ ലൈബ്രറിയിലെ ഈ പബ്ലിഷിംഗ് സംവിധാനം വഴി പ്രസിദ്ധീകരിക്കുവാൻ സൗകര്യമൊരുക്കുമെന്ന് എംഎൽഎ പറഞ്ഞു. ഡിജിറ്റൽ ലൈബ്രറിയുടെ ഉദ്ഘാടനവും എംഎൽഎ നിർവഹിച്ചു.
എംഎൽഎയുടെ പ്രാദേശിക വികസന ഫണ്ടിൽ നിന്നും 12.5 ലക്ഷം രൂപയാണ് ഡിജിറ്റൽ ലൈബ്രറിക്കായി ചിലവഴിച്ചത്. സ്കൂൾ മാനേജർ കെ സി ജേക്കബ് അധ്യക്ഷത വഹിച്ചു. പഞ്ചായത്ത് പ്രസിഡൻ്റ് കെ ആർ പ്രകാശ്, പ്രിൻസിപ്പാൾ സ്മിജു ജേക്കബ്, ഹെഡ്മാസ്റ്റർ ബിനോയി ഏബ്രഹാം, മുൻ പ്രിൻസിപ്പാൾ എബ്രഹാം, ജോജോ കോവൂർ, രവി കുന്നക്കാട് എന്നിവർ പ്രസംഗിച്ചു.
