റാന്നി: ശയ്യാവലംബികളായ കുട്ടികൾക്കായി വൈസ് മെൻ ഇൻ്റർനാഷണൽ റാന്നി ടൗൺ ക്ലബ്ബിൻ്റെ സഹകരണത്തോടെ റാന്നി ബി.ആർ സിയിൽ ഡയപ്പർ ബാങ്ക് തുറന്നു. റാന്നി ബി.ആർ.സിയിലെ ഗൃഹാധിഷ്ഠിത വിദ്യാഭ്യാസം നേടുന്ന കുട്ടികളാണ് ഡയപ്പർ ബാങ്കിൻ്റെ ഗുണഭോക്താക്കൾ. പഴവങ്ങാടി ഗ്രാമപഞ്ചായത്ത് പ്രസിഡൻ്റ് റൂബി കോശി ഡയപ്പർ ബാങ്ക് ഉദ്ഘാടനം ചെയ്തു. വിദ്യാഭ്യാസ സ്ഥിരം സമിതി അധ്യക്ഷ സൗമ്യാ ജി.നായർ യോഗത്തിൽ അധ്യക്ഷത വഹിച്ചു. ബി.പി.സി ഷാജി എ. സലാം പദ്ധതി വിശദീകരിച്ചു.ഉപജില്ലാ വിദ്യാഭ്യാസ ഓഫീസർ പ്രീതി ജോസഫ് മുഖ്യ പ്രഭാഷണം നടത്തി.
വൈസ് മെൻ ഇൻ്റർനാഷണൽ റാന്നി ടൗൺ ക്ലബ്ബ് പ്രസിഡൻ്റ് മാത്യു എബ്രഹാം മുഴുവൻ കുട്ടികൾക്കുമുള്ള ഡയപ്പർ കൈമാറി. വാർഡ് മെമ്പർ ബെനിറ്റ് മാത്യു, എച്ച് എം ഫോറം കൺവീനർ ഷാജി തോമസ്, വൈസ് മെൻ ഇൻ്റർനാഷണൽ ടൗൺ ക്ലബ്ബ് സെക്രട്ടറി ജയ്മോൻ, മുൻ ഡിസ്ട്രിക്ട് ഗവർണർ സ്മിജു ജേക്കബ്, സ്പെഷ്യൽ എഡ്യുക്കേറ്റർ സോണിയ മോൾ ജോസഫ് എന്നിവർ പ്രസംഗിച്ചു. ദിവസവും നാലും അഞ്ചും ഡയപ്പർ ആവശ്യമായ കുടുംബത്തിന് സ്ഥിരമായി സുമനസ്സുകളുടെ സഹായത്തോടെ ഡയപ്പറുകൾ ലഭ്യമാക്കാനാണ് ബി.ആർ.സി യിൽ ഡയപ്പർ ബാങ്ക് തുറന്നതെന്ന് ബി.പി.സി ഷാജി എ. സലാം പറഞ്ഞു.
