റാന്നി: പെരുനാട് ഗ്രാമപഞ്ചായത്തിൽ കാർഷിക മുന്നേറ്റങ്ങൾക്ക് കരുത്തേകാൻ കൃഷിവകുപ്പും ഗ്രാമപഞ്ചായത്തും വിപണന മേഖലയിലേക്ക് പ്രവർത്തനനം വ്യാപിപ്പിക്കുന്നു. പഞ്ചായത്തിനെ തരിശു രഹിതമാക്കാൻ ലക്ഷ്യം വെച്ച് ആരംഭിച്ച “നാടാകെ കൃഷിയിലേക്ക്” ക്യാമ്പയിൻ വഴി അനവധി പുതു സാധ്യതകളാണ് കൃഷി വകുപ്പും ഗ്രാമപഞ്ചായത്തും സംയുക്തമായി നടപ്പാക്കുന്നത്. ഉൽപ്പന്നങ്ങൾക്ക് ന്യായ വില ഉറപ്പു വരുത്തി കർഷകരെ കാർഷിക മേഖലയിൽ പിടിച്ചു നിർത്തുകയാണ് ലക്ഷ്യം. ഈ വര്ഷം തേൻ, കൊക്കോ, കാപ്പി, വറ്റൽമുളക് എന്നിവയുടെ മൂല്യ വർധിത ഉത്പന്നം വിപണിയിൽ എത്തിക്കാനുള്ള ശ്രമത്തിലാണ് ഗ്രാമപഞ്ചായത്ത് കൃഷിഭവൻ. ഇതിൻ്റെ ആദ്യപടിയായി പെരുനാടിന്റെ സ്വന്തം ബ്രാൻഡ് “നമ്മളുടേതാണ് വിശ്വസിക്കാം” ഗ്രാമപഞ്ചായത്ത് പ്രസിഡന്റ് പി എസ് മോഹനൻ പ്രകാശനം ചെയ്തു. ആദ്യ ഉൽപ്പന്നമായ കാർഷിക കര്മ്മസേന ഉൽപാദിപ്പിച്ച സമ്പുഷ്ടീകരിച്ച ജൈവ വളം വിപണിയിൽ എത്തിച്ചു.
ശബരിമല ഇടത്താവളത്തിൽ നടന്ന ചടങ്ങിൽ വൈസ് പ്രസിഡന്റ് ഡി ശ്രീകല, സ്റ്റാന്റിംഗ് കമ്മിറ്റി ചെയർമാൻമാരായ സി എസ് സുകുമാരൻ, ശ്യാം, മോഹിനി വിജയൻ, ഗ്രാമപഞ്ചായത് അംഗങ്ങളായ രമ്യ മോൾ, വര്ഗീസ്, ആസൂത്രണ സമിതി വൈസ് ചെയർമാൻ പി എൻ വി ധരൻ, ഗ്രാമപഞ്ചായത് സെക്രട്ടറി സുനിൽ കുമാർ, കാർഷിക കര്മ്മസേന പ്രസിഡണ്ട് എം കെ മോഹൻദാസ്, സെക്രട്ടറി സതീശൻ, കൃഷി ഓഫീസർ ടി.എസ് ശ്രീതി, കൃഷി അസിസ്റ്റന്റ് എൻ ജിജി, അസിസ്റ്റന്റ് അഗ്രിക്കൾച്ചർ ഓഫീസർ അരുൺജിത് എന്നിവര് പ്രസംഗിച്ചു. വാർഷിക പദ്ധതിയിൽ വിതരണം നടത്തുന്ന കുറ്റികുരുമുളക്, കുറ്റിമുല്ല, മാവ്, പ്ലാവ്, മംഗോസ്റ്റീൻ, പച്ചക്കറി തൈ, ജൈവവളം തുടങ്ങിവയുടെ വിതരണ ഉത്ഘാടനവും ചടങ്ങിൽ നിർവ്വഹിച്ചു.
