ചണ്ടിഗഢ്: ബലാത്സംഗക്കേസില് 20 വര്ഷം തടവുശിക്ഷ അനുഭവിക്കുന്ന ദേരാ സച്ചാ സൗദ നേതാവ് ഗുര്മീത് റാം ഹറീമിന് വീണ്ടും പരോള്. 30 ദിവസത്തേക്ക് പരോള് അനുവദിച്ച് ഹരിയാന സര്ക്കാര് കഴിഞ്ഞ ദിവസം ഉത്തരവിറക്കി. 2020 മുതല് 16 തവണയാണ് ഇദ്ദേഹത്തിന് സര്ക്കാര് പരോള് അനുവദിച്ചത്. ജനുവരി അഞ്ചിന് 40 ദിവസത്തെ പരോള് നല്കിയിരുന്നു. രണ്ട് ശിഷ്യകളെ ബലാത്സംഗം ചെയ്ത കേസില് പഞ്ചകുള സിബിഐ സ്പെഷ്യല് കോടതി 2017 ഓഗസ്റ്റിലാണ് ശിക്ഷിച്ചത്. 2020 ഒക്ടോബറിലാണ് ആദ്യമായി പരോള് അനുവദിച്ചത്. ഇതുവരെ 400 ദിവസം ഇദ്ദേഹത്തിന് പരോള് ലഭിച്ചു. ബുധനാഴ്ച രാവിലെ 6.30 ഓടെ റോത്തകിലെ സുനാരിയ ജയിലില് നിന്നും ഇറങ്ങിയ റാം റഹീം നിരവധി ആഡംബര വാഹനങ്ങളുടെ അകമ്പടിയോടെയാണ് ദേരാ സച്ചാ സൗദ ആസ്ഥാനത്തേക്ക് പോയത്.
ജൂണ് 24ന് അദ്ദേഹം ജയിലില് തിരികെ കയറണം. ജയില് ചട്ടമനുസരിച്ച് വര്ഷത്തില് 10 ആഴ്ചത്തെ വരെ പരോള് ആണ് തടവുകാര്ക്ക് അനുവദിക്കാവുന്നത്. പരോളില് കഴിയുന്ന ഓരോ കാലയളവും ശിക്ഷാകാലാവധിയില് പരിഗണിക്കാറുണ്ട്. പരോളും അവധിയുമായി 98 ദിവസം വരെ ജയിലിന് പുറത്തുകഴിയാന് അനുവദിക്കാറുണ്ട്. ഇത് സര്ക്കാര് നല്കുന്ന വിവിധ ക്ലിയറന്സുകള് ആവശ്യമാണ്. സ്ഥാപനത്തിന്റെ മുന് മാനേജര് രഞ്ജിത് സിംഗിനെയും മാധ്യമപ്രവര്ത്തകന് റാം ചന്ദര് ഛത്രപതി എന്നിവരെ വധിച്ച കേസില് റാം റഹീമിനെ പഞ്ചാബ് ഹരിയാന ഹൈക്കോടതി കുറ്റവിമുക്തനാക്കിയിരുന്നു.
