കൊച്ചി : കൊല്ലം സ്വദേശി ടിക് ടോക് താരം ബലാത്സംഗ കേസില്‍ കൊച്ചിയില്‍ അറസ്റ്റിലായി. വിവാഹ വാഗ്ദാനം നല്‍കി യുവതിയെ പീഡിപ്പിച്ച കേസിലാണ് അറസ്റ്റ്. ടിക് ടോക് താരമായ ഷാനവാസിനെയാണ് കളമശ്ശേരി പോലീസ് അറസ്റ്റ് ചെയ്തത്.
എഫ്‌.ഐ.ആര്‍ രജിസ്റ്റര്‍ ചെയ്ത പ്രതിയുടെ അറസ്റ്റ് രേഖപ്പെടുത്തിയ ശേഷം ഇയാളെ ആലുവയിലെ കൊവിഡ്‌ നിരീക്ഷണ കേന്ദ്രത്തിലേക്ക് മാറ്റി. പ്രതിക്കെതിരെ ഇന്ത്യന്‍ ശിക്ഷാ നിയമത്തിലെ 376, 420, 506 എന്നീ വകുപ്പുകള്‍ പ്രകാരമാണ് കേസെടുത്തിരിക്കുന്നത്. മലപ്പുറം പൊന്നാനി സ്വദേശിയായ 23 കാരിയാണ് താരത്തിനെതിരെ പരാതി നല്‍കിയത്.
വിവാഹ വാഗ്ദാനം നല്‍കി കൊച്ചിയിലെത്തിച്ച്‌ പീഡിപ്പിക്കുകയായിരുന്നു എന്നാണ് യുവതിയുടെ പരാതിയില്‍ പറയുന്നത്. യുവതി കളമശ്ശേരി പോലീസിനും കൊച്ചി ഡി.സി.പി ജി പൂങ്കുഴലിക്കും നല്‍കിയ പരാതിയെ തുടര്‍ന്നാണ് അറസ്റ്റ്. ഇന്നലെ രാത്രിയോടെയാണ് ഷാനവാസിനെ പോലീസ് അറസ്റ്റ് ചെയ്തത്.
