തൊടുപുഴ : ക്രൂര പീഡനത്തിനിരയായ പെണ്കുട്ടി അവശ നിലയില് ആശുപത്രിയില് കഴിയുകയാണ്. സംഭവത്തില് ചെമ്മണ്ണാര് ശാന്തിനഗര് ആര്കെവി എസ്റ്റേറ്റ് സ്വദേശി ഗണേശനെ (48) തൊടുപുഴ സിഐ വി.സി.വിഷ്ണുകുമാറിന്റെ നേതൃത്വത്തില് അറസ്റ്റ് ചെയ്തു. സംഭവത്തില് വ്യാഴാഴ്ച രാത്രിയില് യുവതിയെ കാണാനില്ലെന്നു മാതാപിതാക്കള് പോലീസ് സ്റ്റേഷനില് പരാതി നല്കിയിരുന്നു.
തുടര്ന്ന് യുവതിയുടെ വീട്ടില് പോലീസ് നടത്തിയ പരിശോധനയില് പ്രതിയുടെ ഫോണ് നന്പര് ലഭിച്ചു. ഇതിന്റെ ലൊക്കേഷന് കേന്ദ്രീകരിച്ച് നടത്തിയ അന്വേഷണത്തെ തുടര്ന്ന് ഗണേശന്റെ വീട്ടില് നിന്നും അവശനിലയില് യുവതിയെ കണ്ടെത്തുകയായിരുന്നു. മേസ്തിരിപ്പണി ചെയ്യുന്ന ഗണേശന് ഏതാനും നാളുകളായി മണക്കാട് വാടകയ്ക്കു താമസിക്കുകയായിരുന്നു. ഇതിനിടെ യുവതിയുമായി ഇയാള് അടുപ്പത്തിലായി. ഏതാനും ദിവസം മുന്പ് യുവതിയെ പ്രലോഭിപ്പിച്ചു വാഹനത്തില് കയറ്റി മൂന്നാറിനു പോയി വൈകുന്നേരം മടങ്ങിയെത്തിയിരുന്നു.
