തൃശൂര്‍ : സര്‍ക്കാറിന്റെ ഒന്നാംവാര്‍ഷികത്തിന് മുമ്പ് സംസ്ഥാനത്ത്‌ ഒരു ലക്ഷംപേര്‍ക്ക്‌ കൂടി മുന്‍ഗണന റേഷന്‍ കാര്‍ഡുകള്‍ വിതരണം ചെയ്യുമെന്ന്‌ ഭക്ഷ്യ – പൊതുവിതരണ മന്ത്രി ജി.ആര്‍ അനില്‍ പറഞ്ഞു. 82 കേന്ദ്രങ്ങളിലായി കാര്‍ഡുകള്‍ വിതരണം ചെയ്യും. കേന്ദ്രസര്‍ക്കാര്‍ മുന്‍ഗണന മാനദണ്ഡം കേരളത്തിലെ ജനങ്ങള്‍ക്ക്‌ ദോഷകരമാണ്‌. ഇത്‌ തിരുത്തിക്കാനുള്ള ഇടപെടലുകള്‍ തുടരുകയാണ്‌. സപ്ലൈകോ വെഹിക്കിള്‍ ട്രാക്കിങ് ഉദ്ഘാടനം തൃശൂരില്‍ നിര്‍വഹിക്കുകയായിരുന്നു അദ്ദേഹം. സര്‍ക്കാര്‍ ഇടപെടല്‍ വഴി അനര്‍ഹരായ 1,64,000 പേര്‍ മുന്‍ഗണന കാര്‍ഡുകള്‍ തിരിച്ചു നല്‍കി.
റേഷന്‍ കാര്‍ഡുകള്‍ ഇപ്പോള്‍ സ്‌മാര്‍ട്ടാക്കി. സംസ്ഥാനത്ത്‌ തെരഞ്ഞെടുത്ത 1000 റേഷന്‍ കടകള്‍ സ്‌മാര്‍ട്ടാക്കും. കേരളത്തില്‍ റേഷന്‍ കടകളില്‍ ജയ അരി വിതരണം ചെയ്യാന്‍ ആന്ധ്രയുള്‍പ്പെടെയുള്ള സംസ്ഥാനങ്ങളുമായി ചര്‍ച്ച നടത്തിവരികയാണ്‌. പൊതുവിതരണം ജനകീയമാക്കാനാണ്‌ സര്‍ക്കാര്‍ ശ്രമം. ഇതിന്റെ ഭാഗമായാണ്‌ റേഷന്‍ വണ്ടികള്‍ വഴി മാറുന്നത് തടയിടാന്‍ വെഹിക്കിള്‍ ട്രാക്കിങ്. റേഷന്‍ ഉല്‍പന്നങ്ങള്‍ കയറ്റി പോവുന്ന വാഹനങ്ങളുടെ സഞ്ചാരപാത ഉദ്യോഗസ്ഥര്‍ക്ക്‌ കൃത്യമായി ഇതുവഴി നിരീക്ഷിക്കാനാവും. അടുത്ത ഘട്ടത്തില്‍ ഇത്‌ ജനങ്ങള്‍ക്കും നിരീക്ഷിക്കാന്‍ കഴിയും വിധം വികസിപ്പിക്കുമെന്നും മന്ത്രി പറഞ്ഞു.
