ന്യൂഡൽഹി : മുംബൈ കേന്ദ്രമായി പ്രവര്‍ത്തിക്കുന്ന എക്സ് 10 (X10) ഫിനാൻഷ്യൽ സർവീസസ് ലിമിറ്റഡ് എന്ന നോണ്‍ ബാങ്കിംഗ് ഫിനാന്‍സ് കമ്പനിയുടെ (NBFC) രജിസ്ട്രേഷൻ റിസർവ് ബാങ്ക് റദ്ദാക്കി. ഡിജിറ്റൽ വായ്‌പയുമായി ബന്ധപ്പെട്ട് ഗുരുതരമായ ക്രമക്കേടുകളാണ് ഇവിടെ കണ്ടെത്തിയത്. 31 ടെക് സേവനദാതാക്കളും അവരുടെ ആപ്പുകളും വഴിയാണ് “എക്സ് 10 ” ഡിജിറ്റൽ വായ്‌പ നൽകിയിരുന്നത്. പലതിനും ചൈനീസ് ബന്ധമുണ്ടെന്നാണ് സംശയിക്കപ്പെടുന്നത്. 2015ലാണ് എക്സ് 10 കമ്പനിക്ക് ആർബിഐ പ്രവർത്തനാനുമതി നൽകിയത്.
10 വർഷത്തിനിടയിൽ മൊബിഡ് ടെക്നോളജി, വീകാഷ് ടെക്നോളജി തുടങ്ങി ഒട്ടേറെ സ്‌ഥാപനങ്ങൾ വഴി വായ്പാസേവനം ഔട്ട്സോഴ്സ് ചെയ്തു. ക്രെഡിറ്റ് അപ്രെയ്സൽ, കെവൈസി വെരിഫിക്കേഷൻ, പലിശനിരക്ക് നിർണയിക്കൽ തുടങ്ങിയവയുമായി ബന്ധപ്പെട്ട് വ്യാപക ക്രമക്കേടുകളാണ് ആർബിഐ കണ്ടെത്തിയത്. ചൈനീസ് ഓൺലൈൻ വായ്‌പാ തട്ടിപ്പുമായി ബന്ധപ്പെട്ട എൻഫോഴ്സ്മെന്റ് ഡയറക്ടറേറ്റ് (ഇ.ഡി) കേസിലും എക്സ്10 ഉൾപ്പെട്ടിരുന്നു.
