അഴിയൂർ: കെ – റെയിൽ പദ്ധതി വെറും റിയൽ എസ്റ്റേറ്റ് താത്പര്യം സംരക്ഷിക്കാൻ വേണ്ടി മാത്രമാണെന്ന് എം.കെ മുനീർ എംഎൽഎ ആരോപിച്ചു. ജപ്പാനിൽ 30 വർഷം നടപ്പാക്കി പരാജയപ്പെട്ട പദ്ധതി ഇവിടെ കൊണ്ടുവരാനാണ് ഇടതുസർക്കാർ ശ്രമിക്കുന്നത്. ഇത് തികച്ചും ജനവിരുദ്ധമാണ്.
വടകര മണ്ഡലം യുഡിഎഫ്- ആർഎംപി എന്നിവയുടെ നേതൃത്വത്തിൽ കെ.കെ രമ എംഎൽഎ അഴിയൂർ മുതൽ വടകര വരെ നടത്തുന്ന കെ-റെയിൽ വിരുദ്ധ ജനകീയ മാർച്ചിന്റെ ഉദ്ഘാടനം നിർവഹിച്ച് സംസാരിക്കുകയായിരുന്നു അദ്ദേഹം. ഇതു വരെ കേന്ദ്രാനുമതി ലഭിക്കാത്ത പദ്ധതിക്ക് സ്ഥലം ഏറ്റെടുക്കുന്നത് നിർത്തിവെക്കണമെന്നും മുനീർ ആവശ്യപ്പെട്ടു. അജ്മാൻ ഇസ്മായിൽ അധ്യക്ഷനായി. കോട്ടയിൽ രാധാകൃഷ്ണൻ, കെ.കെ രമ, കെ.എസ് ഹരിഹരൻ, പാറക്കൽ അബ്ദുല്ല, എൻ.വേണു, ആയിഷ ഉമ്മർ, പ്രദീപ് ചോമ്പാല, എൻ.പി അബ്ദുല്ലഹാജി, ഒ.കെ കുഞ്ഞബ്ദുല്ല, പുറന്തോടത്ത് സുകുമാരൻ, പി.ബാബുരാജൻ, ശശിധരൻ തോട്ടത്തിൽ, പി.എം മുസ്തഫ, സി.നിജിൽ, വി.പി പ്രകാശൻ എന്നിവർ സംസാരിച്ചു. മാർച്ച് മുക്കാളിയിൽ നിന്ന് തുടങ്ങി വൈകീട്ട് നാലു മണിക്ക് വടകര കോട്ടപ്പറമ്പിൽ സമാപിക്കും. സമാപന സമ്മേളനം പ്രതിപക്ഷ നേതാവ് വി.ഡി സതീശൻ ഉദ്ഘാടനം ചെയ്യും.
