അമരാവതി : ആന്ധ്രാപ്രദേശില് ആംബുലന്സിലും മിനി വാനിലുമായി കടത്തിയ രക്തചന്ദനത്തടികള് പിടികൂടി. ചിറ്റൂര് റൂറല് പോലീസാണ് ഒരു കോടിയിലേറെ വിലമതിക്കുന്ന 71 ചന്ദനത്തടികള് പിടിച്ചത്. സംഭവത്തില് 15 അന്തര്സംസ്ഥാന കള്ളക്കടത്തുകാരെയും അറസ്റ്റ് ചെയ്തു. പോലീസ് സൂപ്രണ്ട് റിഷാന്ത് റെഡിയുടെ നിര്ദേശപ്രകാരം ചിറ്റൂര് റൂറല് പോലീസ് ചിറ്റൂര്-വേലൂര് റോഡിലൂടെയുള്ള വാഹനങ്ങള് പരിശോധിക്കുകയായിരുന്നു.
തുടര്ന്ന് ഇതുവഴി വന്ന ആംബുലന്സ് തടഞ്ഞുനിര്ത്തി നോക്കിയപ്പോഴാണ് അകത്ത് രക്തചന്ദനത്തടികള് കണ്ടെത്തിയത്. പിന്നാലെ വന്ന മിനി വാനില് നിന്നും ഏതാനും മരത്തടികള് പിടിച്ചെടുത്തു. തടികള് വാട്ടര് ക്യാനിനുള്ളില് ഒളിപ്പിച്ച നിലയിലായിരുന്നു. തിരുപ്പതിയിലെ ശേഷാചലം വനത്തില് നിന്നാണ് സംഘം മരത്തടികള് മുറിച്ചതെന്നും തടികള് തമിഴ്നാട്ടിലേക്ക് കടത്തുന്നതിനിടെയാണ് ഇവര് പിടിയിലായതെന്നും പോലീസ് പറഞ്ഞു.