ജയ്പൂര്: ഞായറാഴ്ച രാജസ്ഥാനിലെ അഞ്ച് ജില്ലകളില് 12 മണിക്കൂര് മൊബൈല് ഇന്റര്നെറ്റ് എസ്.എം.എസ് സേവനങ്ങള് ലഭ്യമാകില്ല. സംസ്ഥാനത്തെ സര്ക്കാര് സ്കൂളുകളിലെ അധ്യാപക നിയമനത്തിനായി നടത്തുന്ന പരീക്ഷയില് തട്ടിപ്പ് തടയാനാണ് ഇത്തരമൊരു മുന്കരുതല്. സര്ക്കാര് സ്കൂളുകളിലേക്കുള്ള 31,000 പോസ്റ്റുകളിലേക്കായി 16 ലക്ഷം ഉദ്യോഗാര്ഥികളാണ് രാജസ്ഥാന് എലിജിബിലിറ്റി എക്സാമിനേഷന് ഫോര് ടീച്ചേഴ്സ് (റീറ്റ്) എഴുതുന്നത്.
ജയ്പൂര്, അജ്മീര്, ദൗസ, ആള്വാര്, ജുന്ജുനു എന്നീ ജില്ലകളിലെ കലക്ടര്മാരാണ് ഇന്റര്നെറ്റ് സേവനം വിച്ഛേദിക്കുന്ന സമയപരിധി നീട്ടണോ വേണ്ടയോ എന്ന് തീരുമാനിക്കേണ്ടത്. രാജസ്ഥാനില് സര്ക്കാര് സ്കൂളുകളില് അധ്യാപകരാകാന് റീറ്റ് പാസാകണം. അപേക്ഷകരുടെ എണ്ണം ഉയര്ന്നതിനാല് സുരക്ഷ സംവിധാനങ്ങളും കോവിഡ് ചട്ടങ്ങളും കര്ശനമായി പാലിക്കാനും സര്ക്കാര് നിര്ദേശം നല്കിയിട്ടുണ്ട്.
പരീക്ഷ കേന്ദ്രങ്ങളിലേക്ക് തലേന്ന് തന്നെ പുറപ്പെടുന്നതിനാല് സംസ്ഥാനത്തെ 33 ജില്ലകളിലെയും ബസ്സ്റ്റാന്ഡുകളില് ശനിയാഴ്ച വൈകീട്ട് മുതല് വലിയ തിരക്ക് അനുഭവപ്പെട്ടു. റീറ്റ് അപേക്ഷകര്ക്ക് സര്ക്കാര്, സ്വകാര്യ ബസുകളില് യാത്ര സൗജന്യമാക്കിയിരുന്നു. മത്സരാര്ഥികളുടെ സൗകര്യത്തിനായി റെയില്വേ 26 സ്പെഷ്യല് ട്രെയിനുകളും ഏര്പെടുത്തിയിട്ടുണ്ട്. 3993 പരീക്ഷ കേന്ദ്രങ്ങളിലായി നടക്കുന്ന പരീക്ഷ രാജസ്ഥാന് ബോര്ഡ് ഓഫ് സെക്കണ്ടറി എജുക്കേഷന് ആണ് സംഘടിപ്പിക്കുന്നത്.
