ദില്ലി : പുതിയ സാഹചര്യങ്ങള് വിലയിരുത്തി കൊവിഡ് നിയന്ത്രണങ്ങളില് കൂടുതല് ഇളവുകള് അനുവദിക്കാന് കേന്ദ്ര ആഭ്യന്തര മന്ത്രാലയം കഴിഞ്ഞ ദിവസം സംസ്ഥാന സര്ക്കാരുകള്ക്ക് നല്കിയ കത്തില് ശുപാര്ശ ചെയ്തു. ആഭ്യന്തര മന്ത്രാലയത്തിന്റെ പുതിയ മാര്ഗ രേഖയനുസരിച്ച് ആരോഗ്യ വകുപ്പ് സെക്രട്ടറി രാജേഷ് ഭൂഷണ് സംസ്ഥാന ചീഫ് സെക്രട്ടറിമാര്ക്ക് കത്തയച്ചു. ഡല്ഹിയില് രാത്രി കര്ഫ്യൂ പിന്വലിക്കാന് ഡല്ഹി ഭൂരന്തനിവാരണ അതോറിറ്റി തീരുമാനിച്ചു. മാസ്ക് ധരിക്കാത്തതിനുള്ള പിഴ 2,000 രൂപയില് നിന്ന് 5,00 രൂപയായി കുറച്ചു.
കേരളത്തില് ഇന്നലെ 3581 പേര്ക്കാണ് കൊവിഡ് സ്ഥിരീകരിച്ചത്. 353 പേരെയാണ് ഇന്നലെ ആശുപത്രിയില് പ്രവേശിപ്പിച്ചത്. 7837 പേര് രോഗമുക്തി നേടി. 8.12 ആണ് ടിപിആര്. എറണാകുളം 637, തിരുവനന്തപുരം 523, കൊല്ലം 364, കോട്ടയം 313, കോഴിക്കോട് 273, തൃശൂര് 228, ആലപ്പുഴ 206, പത്തനംതിട്ട 186, മലപ്പുറം 176, പാലക്കാട് 171, ഇടുക്കി 169, കണ്ണൂര് 158, വയനാട് 129, കാസര്ഗോഡ് 48 എന്നിങ്ങനെയാണ് ജില്ലകളില് ഇന്നലെ രോഗ ബാധ സ്ഥിരീകരിച്ചത്.
സംസ്ഥാനത്തെ വിവിധ ജില്ലകളിലായി 1,18,975 പേരാണ് ഇപ്പോള് നിരീക്ഷണത്തിലുള്ളത്. ഇവരില് 1,16,378 പേര് വീട്/ഇന്സ്റ്റിറ്റിയൂഷണല് ക്വാറന്റൈനിലും 2597 പേര് ആശുപത്രികളിലും നിരീക്ഷണത്തിലാണ്. 353 പേരെയാണ് പുതുതായി ആശുപത്രിയില് പ്രവേശിപ്പിച്ചത്. നിലവില് 37,239 കൊവിഡ് കേസുകളില് 7 ശതമാനം വ്യക്തികള് മാത്രമാണ് ആശുപത്രി/ഫീല്ഡ് ആശുപത്രികളില് പ്രവേശിപ്പിക്കപ്പെട്ടിട്ടുള്ളത്.
