ന്യൂഡല്ഹി: പശ്ചിമേഷ്യയിലെ സംഘര്ഷം വീണ്ടും ശക്തിപ്പെട്ടത് ആഗോള ഇന്ധനവിതരണത്തെ ബാധിക്കുന്ന സാഹചര്യത്തില് ഡീസല് വില്പ്പനയില് നിയന്ത്രണവുമായി റിലയന്സ് ഉടമസ്ഥതയിലുള്ള ജിയോ-ബിപി പമ്പുകള്. പുതിയ നിയന്ത്രണപ്രകാരം പരമാവധി 50 ലിറ്റര് ഡീസല് മാത്രമാണ് ഒരാള്ക്ക് ലഭിക്കുക. ഓരോ പമ്പിലെയും പ്രതിദിന ഡീസല് വില്പ്പന 6000 ലിറ്ററായി പരിമിതപ്പെടുത്തിയതായും ‘ലൈവ് മിന്റ്’ റിപ്പോര്ട്ട് ചെയ്യുന്നു. റിലയന്സ് ഇന്ഡസ്ട്രീസും ബ്രിട്ടീഷ് കമ്പനിയായ ബിപിയും സംയുക്തമായി നടത്തുന്നതാണ് ജിയോ-ബിപി ഇന്ധന പമ്പുകള്. ഇവര്ക്ക് രാജ്യത്താകെ 2000ത്തിലധികം പമ്പുകളുണ്ട്. ദീര്ഘദൂര ട്രക്ക്, ബസ് എന്നിവയുള്പ്പെടെയുള്ള വന്തോതില് ഡീസല് ഉപയോഗിക്കുന്ന വാഹനങ്ങളെയാണ് നിയന്ത്രണം കൂടുതല് ബാധിക്കുക.
ഒരു ഇടപാടില് 50 ലിറ്റര് പരിധി ഏര്പ്പെടുത്തിയതോടെ ദീര്ഘദൂര യാത്ര നടത്തുന്ന ചരക്ക് വാഹനങ്ങള്ക്ക് ആവശ്യമായ ഇന്ധനം ഒരുമിച്ച് നിറയ്ക്കാന് ബുദ്ധിമുട്ടുണ്ടാകും. ഇന്ധനക്ഷാമം മൂലമാണോ നിയന്ത്രണമെന്നത് ജിയോ-ബിപി വ്യക്തമാക്കിയിട്ടില്ല. പശ്ചിമേഷ്യയിലെ സംഘര്ഷത്തെ തുടര്ന്ന് ഹോര്മുസ് കടലിടുക്ക്, ബാബ് അല് മന്ദബ് എന്നിവ വഴിയുള്ള ഇന്ധനനീക്കം തടസ്സപ്പെട്ടതും റഷ്യയില് നിന്നുള്ള ഡീസല് കയറ്റുമതിയിലെ കുറവും ആഗോള ഡീസല് ലഭ്യതയെ ബാധിക്കുന്നുണ്ട്. പശ്ചിമേഷ്യയില് നിന്നുള്ള ഡീസല് കയറ്റുമതി ഗണ്യമായി കുറഞ്ഞതായും റഷ്യന് റിഫൈനറികള്ക്ക് നേരെയുണ്ടായ ആക്രമണങ്ങള് വിതരണത്തെ കൂടുതല് ബാധിച്ചതായും റിപ്പോര്ട്ടുകളുണ്ട്. സംഘര്ഷത്തിന്റെ പശ്ചാത്തലത്തില് അസംസ്കൃത എണ്ണവില ഉയര്ന്നിരിക്കുകയാണ്. ബ്രെന്റ് ക്രൂഡ്ബാരലിന് 100 ഡോളറിന് മുകളിലാണ് വ്യാപാരം.
