കൊച്ചി: രാജി പിൻവലിച്ച് സർവീസിൽ തുടരാൻ അനുവദിക്കണമെന്ന് ആവശ്യപ്പെട്ട് കശുവണ്ടി വികസന കോർപ്പറേഷൻ അഴിമതിക്കേസിലെ പ്രതിയായ കെ.എ രതീഷ് ഹൈക്കോടതിയിൽ. തനിക്കെതിരായ പ്രോസിക്യൂഷൻ അനുമതി അടക്കമുള്ള നടപടികൾ ഹൈക്കോടതി ഡിവിഷൻ ബെഞ്ച് സ്റ്റേ ചെയ്ത പശ്ചാത്തലത്തിലാണ് ഈ ആവശ്യം ഉന്നയിച്ചിരിക്കുന്നത്. കേസിൽ പ്രോസിക്യൂഷൻ നടപടികൾക്ക് സംസ്ഥാന സർക്കാർ അനുമതി നൽകിയതിനെ തുടർന്ന്, കെ.എ രതീഷ് ഔദ്യോഗിക പദവികളിൽ തുടരുന്നതിനെതിരെ മുമ്പ് ഹൈക്കോടതി ചോദ്യങ്ങൾ ഉയർത്തിയിരുന്നു.
ഇതിന് പിന്നാലെയാണ് കേരള ഖാദി ബോർഡ് ആൻഡ് വില്ലേജ് ഇൻഡസ്ട്രീസ് സെക്രട്ടറി സ്ഥാനത്ത് നിന്ന് രാജിവെക്കാൻ സർക്കാർ ഇയാളോട് നിർദേശിക്കുകയും നിർബന്ധിത രാജി എഴുതി വാങ്ങുകയും ചെയ്തത്. എന്നാൽ പ്രോസിക്യൂഷൻ അനുമതിയുമായി ബന്ധപ്പെട്ട് സിംഗിൾ ബെഞ്ചിൽ നിന്നുണ്ടായ തീരുമാനങ്ങൾ പിന്നീട് ഡിവിഷൻ ബെഞ്ച് സ്റ്റേ ചെയ്തിരുന്നു. പ്രോസിക്യൂഷൻ അനുമതി നടപടികൾ സ്റ്റേ ചെയ്ത സാഹചര്യത്തിൽ താൻ പദവിയിൽ തുടരാൻ വീണ്ടും യോഗ്യനാണെന്നും അതിനാൽ രാജി പിൻവലിച്ച് സർവീസിൽ തിരികെ പ്രവേശിക്കാൻ അനുമതി നൽകണമെന്നുമാണ് ഹർജിയിലെ പ്രധാന ആവശ്യം. കെ.എ രതീഷിന്റെ ഈ ഹരജിയിൽ ഹൈക്കോടതി നാളെ വാദം കേൾക്കും.
