തിരുവനന്തപുരം: വിവാഹ വാര്‍ഷികവും പുസ്തകദിനവും ഒരുദിവസമായതോടെ വേറിട്ട ആഹ്ലാദ പ്രകടനവുമായി പ്രതിപക്ഷ നേതാവ് രമേശ് ചെന്നിത്തല. അനിതയുമായുള്ള വിവാഹ ജീവിതത്തിന് മൂന്നരപതിറ്റാണ്ട് തികഞ്ഞ വേളയില്‍ ഗ്രന്ഥശാലയ്ക്ക് പുസ്തകങ്ങള്‍ സമ്മാനമായി നല്‍കിക്കൊണ്ടാണ് ചെന്നിത്തല വിവാഹ ദിവസം അവിസ്മരണീയമാക്കിയത്. 35 വര്‍ഷം തികയുന്ന ദാമ്പത്യ ജീവിതത്തിന്റെ പ്രതീകമായി 35 പുസ്തകങ്ങളാണ് തിരുവനന്തപുരം നെല്ലിമൂട് ദേശാഭിവര്‍ദ്ധിനി ഗ്രന്ഥശാലയ്ക്ക് ചെന്നിത്തലയും സഹധര്‍മ്മിണിയും ചേര്‍ന്ന് സമ്മാനിച്ചത്.
ഏപ്രില്‍ 23നാണ് ചെന്നിത്തലയുടെ വിവാഹ വാര്‍ഷിക ദിനം. ലോക പുസ്തകദിനം കൂടിയാണ് 23 എന്ന പ്രത്യേകത കൂടി ഒത്തുവന്നതോടെ വിശേഷ ദിവസത്തില്‍ വേറിട്ട രീതിയില്‍ സന്തോഷം കണ്ടെത്തുകയായിരുന്നു ചെന്നിത്തലയും കുടുംബവും. തന്റെ ഫേസ്ബുക്ക് കുറിപ്പിലൂടെ ചെന്നിത്തല തന്നെയാണ് ഇക്കാര്യം പങ്കുവെച്ചത്.
