ന്യൂഡല്ഹി: അടിസ്ഥാനപലിശനിരക്കില് 0.25 ശതമാനത്തിന്റെ കുറവ് വരുത്തി റിസര്വ് ബാങ്ക് ഓഫ് ഇന്ത്യ (ആര്ബിഐ). റിപ്പോ നിരക്ക് 5.25 ശതമാനമായതോടെ ഭവന, വാഹന, വ്യക്തിഗത വായ്പകളുടെ പലിശ നിരക്കില് കുറവുണ്ടാകും. മൂന്ന് ദിവസത്തെ മോണിറ്ററി പോളിസി കമ്മിറ്റി (എംപിസി) യോഗത്തിന് ശേഷം ആര്ബിഐ ഗവര്ണര് സഞ്ജയ് മല്ഹോത്രയാണ് തീരുമാനം അറിയിച്ചത്. നിരക്ക് കുറവ് ഉടനടി പ്രാബല്യത്തില് വരുമെന്നും നിലവില് ഉയര്ന്നുവരുന്ന മാക്രോ ഇക്കണോമിക് സാഹചര്യങ്ങളെയും ഭാവി പ്രതീക്ഷകളെയും കുറിച്ച് എംപിസി വിശദമായ വിലയിരുത്തല് നടത്തിയതായി ഗവര്ണര് പറഞ്ഞു.
‘റിപ്പോ നിരക്ക് ചര്ച്ച ചെയ്ത് തീരുമാനിക്കാന് ഡിസംബര് 3, 4, 5 തീയതികളില് എംപിസി യോഗം ചേര്ന്നു. ഉയര്ന്നുവരുന്ന ‘മാക്രോ ഇക്കണോമിക്’ സാഹചര്യങ്ങളെയും ഭാവി പ്രതീക്ഷകളെയും കുറിച്ചുള്ള വിശദമായ വിലയിരുത്തലുകളുടെ അടിസ്ഥാനത്തില് റിപ്പോ നിരക്ക് 25 ബേസിസ് പോയിന്റുകള് കുറച്ച് 5.25 ശതമാനമായി കുറയ്ക്കാന് എംപിസി ഏകകണ്ഠമായി തീരുമാനിച്ചു’ ആര്ബിഐ ഗവര്ണര് സഞ്ജയ് മല്ഹോത്രയാണ് അറിയിച്ചു. ഈ കലണ്ടര് വര്ഷം ആര്ബിഐ എംപിസി ഇതുവരെ റിപ്പോ നിരക്ക് 125 ബേസിസ് പോയിന്റ് കുറച്ചു. ഫെബ്രുവരി മുതല് നിരക്ക് കുറയ്ക്കല് തുടങ്ങിയിരുന്നു. ഫെബ്രുവരി മുതല് ജൂണ് വരെ, നിരക്ക് 6.5 ശതമാനത്തില് നിന്ന് 5.5 ശതമാനമായി കുറച്ചിരുന്നു. ഓഗസ്റ്റ്, ഒക്ടോബര് മാസങ്ങളിലും ഇത് നിലനിര്ത്തിയിരുന്നു.
