തിരുവനന്തപുരം: സംസ്ഥാനത്ത് ഭിന്നശേഷി വിഭാഗങ്ങൾക്ക് വിവിധ മേഖലയിൽ നൽകിവരുന്ന സംവരണ ഇളവുകൾ പ്രഖ്യാപിച്ചു. റിപ്പോർട്ടുകൾ പ്രകാരം, കുട്ടികൾ കുറവുള്ള എയ്ഡഡ് സ്കൂളുകളിൽ റെഗുലർ ഒഴിവുകളിലെ ദിവസവേതന നിയമനത്തിന് ഭിന്നശേഷി സംവരണം പാലിക്കേണ്ടതില്ല. ഇത് സംബന്ധിച്ച ഉത്തരവ് സർക്കാർ പുറത്തിറക്കിയിട്ടുണ്ട്. അതേസമയം, 2018 നവംബർ 18ന് മുൻപുള്ള ഒഴിവുകളിലെ താൽക്കാലിക നിയമനങ്ങൾക്ക് പുതിയ സംവരണം ബാധകമല്ലെന്ന് അറിയിച്ചിട്ടുണ്ട്.
സ്കൂളിൽ മതിയായ എണ്ണം വിദ്യാർത്ഥികൾ പ്രവേശനം നേടിയാൽ ഭിന്നശേഷി സംവരണം ബാധകമാകുമെന്നും ഉത്തരവിൽ വ്യക്തമാക്കി. എയ്ഡഡ് സ്കൂളുകളിലെ അധ്യാപക, അനധ്യാപക ഒഴിവുകളിൽ ഭിന്നശേഷി സംവരണം മുൻകാല പ്രാബല്യത്തോടെ നടപ്പാക്കണമെന്ന് കോടതി ഉത്തരവിറക്കിയിരുന്നു. ഇതിന്റെ അടിസ്ഥാനത്തിൽ പുറത്തിറക്കിയ മാർഗ്ഗനിർദ്ദേശങ്ങളിൽ വ്യക്തത വരുത്തിയാണ് പൊതു വിദ്യാഭ്യാസ വകുപ്പ് പുതിയ ഉത്തരവ് പുറപ്പെടുവിച്ചിരിക്കുന്നത്. ഇതിനോടൊപ്പം തന്നെ വിവിധ മേഖലകളിൽ ഇളവുകൾ അനുവദിക്കുന്ന വിഷയവും സർക്കാരിന്റെ പരിഗണനയിലുണ്ട്.
