പറവൂർ : എഐസിസി ജനറല് സെക്രട്ടറി കെ സി വേണുഗോപാലിനെ അനുകൂലിച്ച് ഫേസ്ബുക്കിൽ പോസ്റ്റിട്ടതിന്റെ പേരിൽ പ്രതിപക്ഷനേതാവ് വി ഡി സതീശന്റെ ഓഫീസ് സ്റ്റാഫിൽനിന്ന് ഭീഷണി നേരിടുന്നതായി യൂത്ത് കോൺഗ്രസ് നേതാവിന്റെ പരാതി. യൂത്ത് കോൺഗ്രസ് പറവൂർ മണ്ഡലം സെക്രട്ടറിയും കെഎസ്യു ബ്ലോക്ക് സെക്രട്ടറിയുമായ ആരോൺ ബി സ്രാമ്പിക്കലാണ് ഡിജിപിക്ക് പരാതി നൽകിയത്. തന്റെ ജീവന് ഭീഷണിയുണ്ടെന്ന് ഡിജിപിക്കും ആലുവ റൂറൽ എസ്പിക്കും നൽകിയ പരാതിയിൽ ആരോൺ സൂചിപ്പിക്കുന്നു. പ്രതിപക്ഷനേതാവിന്റെ ഓഫീസ് സ്റ്റാഫുകളുടെ അറിവോടെയാണ് അസഭ്യവർഷവും ഭീഷണിയും നടക്കുന്നതെന്നും നടപടി സ്വീകരിക്കണമെന്നും പരാതിയിലുണ്ട്.
അതിനിടെ, നിയമസഭാ തെരഞ്ഞെടുപ്പ് ഫലത്തിന് മുൻപ് മുഖ്യമന്ത്രി പദവിക്കായുള്ള നേതാക്കളുടെ പോരിൽ കോൺഗ്രസിൽ അതൃപ്തി പുകയുകയാണ്. എഐസിസി സംഘടനാ ജനറൽ സെക്രട്ടറി കെ സി വേണുഗോപാലിനെ പുകഴ്ത്തി കഴിഞ്ഞ ദിവസം കെ സുധാകരൻ രംഗത്തിയിരുന്നു. സുധാകരന് പിന്നാലെ കെ സി വേണുഗോപാലിനെ പുകഴ്ത്തി സന്ദീപ് വാര്യരും മറ്റ് നേതാക്കളും രംഗത്തെത്തി. മറുഭാഗത്ത് സതീശൻ വിഭാഗവും അവകാശവാദവുമായി രംഗത്തുണ്ട്. ഇതോടെ തെരഞ്ഞെടുപ്പ് ഫലത്തിന് മുമ്പ് തന്നെ കോൺഗ്രസിൽ ഉൾപാർടി പോര് രൂക്ഷമായി.
