കണ്ണൂര് : ‘ജനസമക്ഷം സില്വര്ലൈന്’ പരിപാടി നടന്ന സ്ഥലത്തേക്ക് തള്ളിക്കയറാന് ശ്രമിച്ച യൂത്ത് കോണ്ഗ്രസ് നേതാക്കള് ആക്രമിക്കപ്പെട്ട സംഭവത്തില് അതിരൂക്ഷ പ്രതികരണവുമായി കോണ്ഗ്രസ് സംസ്ഥാന വൈസ് പ്രസിഡന്റ് റിജില് മാക്കുറ്റി. തനിക്ക് മര്ദ്ദനമേറ്റതില് സഖാക്കളേക്കാള് സന്തോഷം സംഘികള്ക്കാണെന്ന് അദ്ദേഹം ഫേസ്ബുക്കില് കുറിച്ചു. തന്റെ വീടിന്റെയോ കുടുബത്തിന്റെയോ ഒരിഞ്ച് സ്ഥലം പോലും പോകില്ല. കുടിയൊഴിപ്പിക്കപ്പെടുന്ന പതിനായിരങ്ങള്ക്ക് വേണ്ടിയാണ് ഈ സമരം. ഡിവൈഎഫ്ഐ ഗുണ്ടകളെ ഉപയോഗിച്ച് പിണറായി വിജയന് അടിച്ചമര്ത്താന് നോക്കിയാല് സമരത്തില് മരിക്കേണ്ടി വന്നാലും പിറകോട്ടില്ല. യെച്ചൂരിയെ തല്ലിയ സംഘികളും ജയകൃഷ്ണന് മാസ്റ്ററെ പടമാക്കിയ കേരളത്തിലെ സഖാക്കളും ഒന്നാണ്. ഇതാണ് ചുവപ്പ് നരച്ചാല് കാവിയെന്നും അദ്ദേഹം ആരോപിച്ചു.
‘ജനസമക്ഷം സില്വര്ലൈന്’ പരിപാടി നടന്ന സ്ഥലത്തേക്ക് തള്ളികയറാന് ശ്രമിച്ച യൂത്ത് കോണ്ഗ്രസ് പ്രവര്ത്തകരെ പരിപാടിയില് പങ്കെടുക്കാനെത്തിയവര് വളഞ്ഞിട്ടാക്രമിച്ചിരുന്നു. സംഭവത്തിന് പിന്നാലെ സംഘപരിവാര് അനുകൂല പ്രൊഫൈലുകള് സന്തോഷം പ്രകടിപ്പിച്ച് പോസ്റ്റുകള് പങ്കുവച്ചിരുന്നു. തുടര്ന്നാണ് റിജില് മാക്കുറ്റിയുടെ പ്രതികരണം.
ഫേസ്ബുക്ക് പോസ്റ്റിന്റെ പൂര്ണ രൂപം
“എന്റെ വീടോ എന്റെ കുടുബത്തിന്റെ ഒരിഞ്ച് സ്ഥലമോ പോകില്ല. കുടി ഒഴിപ്പിക്കപ്പെടുന്ന പതിനായിരങ്ങള്ക്ക് വേണ്ടിയാണ് ഈ സമരം. ഡിവൈഎഫ്ഐ ഗുണ്ടകളെ ഉപയോഗിച്ച് പിണറായി വിജയന് അടിച്ചമര്ത്താന് നോക്കിയാല് സമരത്തില് നിന്ന് മരിക്കേണ്ടി വന്നാലും പിറകോട്ടില്ല. ഇത് കെപിസിസി പ്രസിഡന്റും പ്രതിപക്ഷനേതാവും യുഡിഎഫും പ്രഖ്യാപിച്ച സമരമാണ്. സമരത്തെ ഭീരുക്കളാണ് അക്രമിക്കുന്നത്. സഖാക്കളെക്കാളും സന്തോഷം സംഘികള്ക്ക് ആണ്. അതു കൊണ്ട് തന്നെ എന്റെ നിലപാട് ശരിയുടെ പക്ഷത്താണ്. അത് കുടി ഒഴിപ്പിക്കുന്ന പിണറായി ഭരണകൂടത്തിന് എതിരെയാണ്. ഭക്ഷണത്തിന്റെ പേരില് മനുഷ്യരെ തല്ലി കൊല്ലുന്ന സംഘപരിവാറിനെതിരെയാണ്. അതിനെതിരെ സമരം ചെയ്യുക തന്നെ ചെയ്യും. ഭയപ്പെടുത്തി കീഴ്പ്പെടുത്താമെന്നോ അക്രമിച്ച് ഇല്ലാതാക്കമെന്നും സഖാക്കളോ സംഘികളോ നേക്കണ്ട പിന്നെ യെച്ചൂരിയെ തല്ലിയ സംഘികളും ജയകൃഷ്ണന് മാസ്റ്ററെ പടമാക്കിയ പിണറായിയുടെ കേരളത്തിലെ സംഘാക്കളും ഒന്നാണ്. അതാണല്ലോ ജയകൃഷ്ണന് മാസ്റ്റര് അനുസ്മരണത്തില് സംഘികള് വിളിച്ച മുദ്രാവാക്യം സഖാക്കള്ക്ക് എതിരെ അല്ലല്ലോ മുസ്ലിം മത വിശ്വസിക്കള്ക്ക് എതിരെയാണല്ലോ? സംഘികള്ക്ക് എതിരെ യുഎപിഎ പോലും ചുമത്താതെ സംരക്ഷിച്ചത് പിണറായി പോലീസ്. ഇതാണ് ചുവപ്പ് നരച്ചാല് കാവി.”
