തിരുവല്ല: പാർലമെന്റ് സമ്മേളനങ്ങളുടെ തത്സമയ സംപ്രേഷണങ്ങളിൽ ഇന്ത്യൻ ആംഗ്യഭാഷ (ISL) പരിഭാഷ ഉൾപ്പെടുത്തണമെന്ന് ആവശ്യപ്പെട്ട് യൂത്ത് കോൺഗ്രസ് പത്തനംതിട്ട ജില്ലാ ജനറൽ സെക്രട്ടറി റിജോ വള്ളംകുളം ദേശീയ മനുഷ്യാവകാശ കമ്മീഷനും ലോക്സഭാ സ്പീക്കർ ഓം ബിർളക്കും പരാതി നൽകി. കേൾവിയും സംസാര ശേഷിയിലും ബുദ്ധിമുട്ടുകൾ നേരിടുന്ന deaf / hearing impaired വിഭാഗക്കാർക്ക് മറ്റാരെയും ആശ്രയിക്കാതെ പാർലമെന്റ് നടപടികൾ കൃത്യമായി മനസ്സിലാക്കാനും ജനാധിപത്യ പ്രക്രിയകളിൽ സമാന പങ്കാളിത്തം ഉറപ്പാക്കാനും ആംഗ്യഭാഷ പരിഭാഷ അനിവാര്യമാണെന്ന് പരാതിയിൽ ചൂണ്ടിക്കാട്ടുന്നു.
പാർലമെന്റ് സമ്മേളനങ്ങൾ Sansad TV, YouTube ഉൾപ്പെടെയുള്ള തത്സമയ സംപ്രേഷണങ്ങളിലൂടെ ഇന്ത്യൻ ആംഗ്യഭാഷ വ്യാഖ്യാനത്തോടുകൂടി ലഭ്യമാക്കുന്നത് കാലത്തിന്റെ ആവശ്യകതയും ഭിന്നശേഷി സൗഹൃദ ജനാധിപത്യത്തിന്റെ ഭാഗവുമാണെന്ന് റിജോ വള്ളംകുളം പരാതിയിൽ പറയുന്നു. ഇതിനാവശ്യമായ അടിയന്തര നടപടി സ്വീകരിക്കണമെന്ന് ആവശ്യപ്പെട്ടാണ് ദേശീയ മനുഷ്യാവകാശ കമ്മീഷനും ലോക്സഭാ സ്പീക്കർക്കും നിവേദനം സമർപ്പിച്ചത്.
