വടകര : ആര്.എം.പി നേതാക്കളടക്കമുള്ള 16 പേര് സി.പി.എമ്മിലേക്ക് മടങ്ങി. അടവ് നയത്തിന്റെ വിജയമെന്ന് സി.പി.എം വിലയിരുത്തുമ്പോള് ആര്.എം.പി പ്രതിരോധത്തില്. ആര്.എം.പി.ഐ വടകര ഏരിയ സെക്രട്ടറി കെ. ലിനീഷ്, ഒഞ്ചിയം ഏരിയ കമ്മിറ്റി അംഗം പി. രാജേഷ് (ചിണ്ടന്), ലോക്കല് കമ്മിറ്റി അംഗങ്ങള് ഉള്പ്പെടെയുള്ള 16 പേരാണ് ആര്.എം.പിയോട് വിട പറഞ്ഞ് സി.പി.എമ്മിലേക്ക് തിരിച്ചെത്തിയത്.
അടുത്തകാലത്തായി സി.പി.എം ആര്.എം.പിക്കെതിരെ പുലര്ത്തിപ്പോരുന്ന മൃദു നിലപാടുകളാണ് നേതാക്കളടക്കമുള്ളവരെ മാതൃസംഘടനയിലേക്കു തന്നെ തിരിച്ചെത്തിച്ചതെന്നാണ് വിലയിരുത്തല്. പൊതുവേദികളിലടക്കം ബദ്ധശത്രുവായ ആര്.എം.പിക്കെതിരെ വിമര്ശനം ഉയര്ത്താതെ അണികളെ പ്രകോപിപ്പിക്കാതിരിക്കാന് സി.പി.എം പ്രത്യേകം ശ്രദ്ധിച്ചിരുന്നു. പ്രവര്ത്തനരംഗത്ത് കുറെക്കാലമായി നിര്ജീവമായ പ്രവര്ത്തകരാണ് രാജിവെച്ചതെന്ന് ആര്.എം.പി വൃത്തങ്ങള് വിശദീകരിക്കുന്നു.
