ന്യൂഡല്ഹി : രാജ്യത്ത് നരേന്ദ്രമോദി അധികാരത്തിലെത്തിയ ശേഷമാണ് ഇന്ത്യയ്ക്ക് സ്വാതന്ത്ര്യം ലഭിച്ചതെന്ന് ബോളിവുഡ് നടി കങ്കണ റണാവത്ത്. സ്വാതന്ത്ര്യത്തിന്റെ 75-ാം വാര്ഷികത്തില് ടൈംസ് നൗ സംഘടിപ്പിച്ച സമ്മിറ്റില് സംസാരിക്കുമ്പോഴായിരുന്നു കങ്കണ വിവാദ പ്രസ്താവന നടത്തിയത്. ഇതിന്റെ ദൃശ്യങ്ങള് സമൂഹമാധ്യമങ്ങളില് പ്രചരിച്ചതോടെ നടിക്കെതിരെ രൂക്ഷവിമര്ശനങ്ങളാണ് ഉയരുന്നത്.
“1947 ല് ഇന്ത്യയ്ക്ക് ലഭിച്ചത് സ്വതന്ത്ര്യമായിരുന്നില്ല. ഭിക്ഷയായിരുന്നു. രാജ്യം യഥാര്ഥത്തില് സ്വതന്ത്രമായത് 2014 ലാണ്-” കങ്കണ ചൂണ്ടിക്കാട്ടി. ട്വിറ്ററിലും മറ്റു സമൂഹമാധ്യമങ്ങളിലും ഈ ദൃശ്യങ്ങള് വ്യാപകമായി പ്രചരിക്കുന്നുണ്ട്. ബ്രിട്ടീഷ് ഭരണത്തിനെതിരെ പോരാടി സ്വാതന്ത്ര്യത്തിലേക്ക് ഇന്ത്യയെ നയിച്ചവരെ അപമാനിക്കുന്ന പരാമര്ശമാണ് കങ്കണയുടെതെന്നും പ്രസ്താവനയില് നടി മാപ്പു പറയണമെന്നും വിമര്ശകര് പറയുന്നു.
