റാന്നി: ഇട്ടിയപ്പാറ ടൗണില് വണ്വെ സമ്പ്രദായം കര്ശനമാക്കാന് ട്രാഫിക് റെഗുലേറ്ററി കമ്മിറ്റി തീരുമാനിച്ചു. ടൗണിലെ ഗതാഗത കുരുക്ക് ഒഴിവാക്കാനും വണ്വെ തെറ്റിച്ചെത്തുന്ന വാഹനങ്ങള്ക്കെതിരെ ശക്തമായ നടപടിയെടുക്കാനുമാണ് തീരുമാനം. ഇട്ടിയപ്പാറ ചന്തയ്ക്കു മുന്നിലെ ഓട്ടോസ്റ്റാന്ഡിലെ ഓട്ടോറിക്ഷകളുടെ റോഡിന് അഭിമുഖമായുള്ള ഇപ്പോഴത്തെ പാര്ക്കിംങ് മാറ്റും.
പകരം റോഡരികില് ചേര്ന്ന് പാര്ക്കിംങ് അനുവദിക്കും. വഴിയോരവാണിഭം തടയും. അനധികൃത പാര്ക്കിംങ് കര്ശനമായി തടയും. വാഹനങ്ങള്ക്ക് പാര്ക്കിംങ് സ്ഥലങ്ങള് മാര്ക്കു ചെയ്തു നല്കും. ബസ് സ്റ്റാന്ഡിലെ പോലീസ് എയ്ഡ് പോസ്റ്റിൽ ഹോംഗാര്ഡിനു പകരം പോലീസ് ഉദ്യോഗസ്ഥര്ക്ക് ചുമതല നല്കും. ദിശാ ബോർഡുകൾ ഇല്ലാത്ത സ്ഥലത്ത് പുതിയ ബോര്ഡുകള് സ്ഥാപിക്കും.
അക്ഷരങ്ങള് മാഞ്ഞുപോയ ബോർഡുകൾ പുനസ്ഥാപിക്കുന്നതിനും തീരുമാനിച്ചു. ഗ്രാമപഞ്ചായത്ത് പ്രസിഡന്റ് അനിതാ അനിൽകുമാർ അധ്യക്ഷത വഹിച്ച യോഗത്തില് ഗ്രാമ പഞ്ചായത്ത് അംഗങ്ങൾ, രാഷ്ട്രീയപാർട്ടികളുടെ പ്രതിനിധികൾ
വ്യാപാരി വ്യവസായി ഏകോപന സമിതി പ്രതിനിധികള്,തൊഴിലാളി സംഘടന നേതാക്കൾ,പോലീസ്,പിഡബ്ല്യുഡി,റവന്യൂ, ഉദ്യോഗസ്ഥർ എന്നിവർ പങ്കെടുത്തു.