കാട്ടാക്കട: തോക്കിന് മുനയില് നിര്ത്തി കവര്ച്ചയ്ക്ക് ഇരയായ മൂകയും ബധിരയുമായ കുമാരി(53)യില് നിന്ന് മൊഴി ശേഖരിക്കാന് പോലീസ് സ്പെഷല് സ്കൂള് അധ്യാപികയുടെ സഹായം തേടി. ഇവരുടെ സഹായത്തോടെ മോഷ്ടാവിന്റെ രൂപ സാദൃശ്യവും മോഷണ രീതിയും പോലീസ് കുമാരിയില് നിന്നു മനസ്സിലാക്കി. പൊക്കം കുറഞ്ഞ വ്യക്തിയാണ് മോഷ്ടാവ്. കുമാരി നല്കിയ സൂചനകള് അനുസരിച്ച് ഇവരെ വ്യക്തമായി അറിയാവുന്ന ആരോ ആണ് മോഷണത്തിനു പിന്നിലെന്നാണ് പോലീസ് നിഗമനം.
മോഷണത്തിനായി വീട്ടില് കയറി കുമാരിയുടെ അടുത്ത് എത്തിയ മോഷ്ടാവ് ശബ്ദിക്കരുതെന്ന് ആംഗ്യം കാട്ടിയ ശേഷം മോഷ്ടാവ് സ്വന്തം കാതില് തൊട്ട് കാണിച്ചാണ് കമ്മല് ഊരി നല്കാന് ആവശ്യപ്പെട്ടത്. വിസമ്മതിച്ചതോടെ തോക്ക് ചൂണ്ടി ഭീഷണിപ്പെടുത്തി മുടിക്ക് പിടിച്ച് തല കുനിച്ച് ഇടിച്ചു. ഇതോടെ കമ്മല് ഊരി നല്കി. കമ്മല് ഊരി വാങ്ങിയ ശേഷം സമീപത്തെ മുറിക്കുള്ളില് കയറി അലമാരയിലെ സാധനങ്ങള് വാരിവലിച്ചിട്ടു പരിശോധിച്ചു.
എന്നാല് ഇവരുടെ കൊച്ചുമക്കള് ഉറങ്ങിയിരുന്ന മുറിയിലേക്ക് കള്ളന് കടന്നില്ല. ഇതിനു ശേഷം പിന്വശത്തെ വാതിലില് കൂടി പുറത്തേക്ക് കടക്കുകയായിരുന്നു. രണ്ട് ദിവസം മുന്പ് കുമാരിയുടെ മരുമകന് ചിട്ടി നറുക്കെടുപ്പിലൂടെ ലഭിച്ചിരുന്നതായി വിവരമുണ്ട്. ഈ തുക വാങ്ങാന് ആവശ്യമായ ജാമ്യ രേഖകള് ശരിയാക്കി നല്കിയത് 2 ദിവസം മുന്പ്. ഈ പശ്ചാത്തലവും പോലീസ് പരിശോധിക്കുന്നു.
