തിരുവനന്തപുരം : യുഡിഎഫില് തല്ക്കാലം നില്ക്കാന് ആര്എസ്പി. കോണ്ഗ്രസുമായി തിങ്കളാഴ്ച രാവിലെ നടക്കുന്ന ഉഭയകകക്ഷി ചര്ച്ചയില് ആര്എസ്പി പങ്കെടുക്കും. പാര്ട്ടി ഉന്നയിച്ച ആവശ്യങ്ങള്ക്കു ഉഭയകക്ഷി ചര്ച്ചയില് തീരുമാനമായാല് ഉച്ചകഴിഞ്ഞു നടക്കുന്ന യുഡിഎഫില് യോഗത്തില് പങ്കെടുക്കാനാണ് ആര്എസ്പി സംസ്ഥാന സമിതിയോഗത്തിന്റെ തീരുമാനം. പാര്ട്ടി, യുഡിഎഫ് വിടുമോ എന്ന ആകാംക്ഷയ്ക്കു യാതൊരു അടിസ്ഥാനമില്ലെന്നും ആര്എസ്പി യുഡിഎഫിന്റെ അവിഭാജ്യ ഘടകമാണെന്നും സംസ്ഥാന സെക്രട്ടറി എ.എ. അസീസ് പറഞ്ഞു.
തെരഞ്ഞെടുപ്പില് ജയവും പരാജയവുമുണ്ടാകുന്നതു സ്വാഭാവികമാണ്. പരാജയത്തിന്റെ പേരില് മുന്നണിയോടു വഞ്ചനാപരമായ നിലപാടു സ്വീകരിക്കാന് പാര്ട്ടിക്കു കഴിയില്ല. ഉഭയകക്ഷി ചര്ച്ചയിലും യുഡിഎഫ് യോഗത്തിലും പാര്ട്ടി പങ്കെടുക്കുമെന്നും അസീസ് പറഞ്ഞു.
പ്രശ്നങ്ങള് വ്യക്തമാക്കി മുന്നണിക്കു നല്കിയ കത്ത് കോണ്ഗ്രസ് നേതൃത്വം ഗൗരവത്തിലാണ് കണ്ടതെന്നും പ്രശ്നങ്ങള് പരിഹരിക്കാന് ഉഭയകക്ഷി ചര്ച്ചയില് പാര്ട്ടി പങ്കെടുക്കുമെന്നും എന്.കെ. പ്രേമചന്ദ്രന് എംപി പറഞ്ഞു. ഉഭയകകക്ഷിയിലെ തീരുമാനത്തിന്റെ അടിസ്ഥാനത്തില് യുഡിഎഫ് യോഗത്തില് പങ്കെടുക്കുന്ന കാര്യത്തില് തീരുമാനമെടുക്കുമെന്നും പ്രേമചന്ദ്രന് പറഞ്ഞു.