പത്തനംതിട്ട: റിങ് റോഡരികിലെ കടയില് സാധനം വാങ്ങിക്കൊണ്ട് നിന്ന വീട്ടമ്മ അമിത വേഗത്തിലെത്തിയ കാറിടിച്ച് മരിച്ചു. ഒപ്പമുണ്ടായിരുന്ന ഭര്ത്താവിന് പരുക്കേറ്റു. കരിമ്പനാക്കുഴി ആലുംമൂട്ടില് സത്യന്റെ (പുഷ്പാംഗദന് ) ഭാര്യ ശാന്തയാണ് (56) മരിച്ചത്.
സെന്റ് സ്റ്റീഫന്സ് കത്തീഡ്രലിന് സമീപം റിങ് റോഡില് രാത്രി എട്ടോടെയാണ് അപകടം. ഇവിടെ ചായക്കട നടത്തുന്ന സത്യനും ശാന്തയും കടപൂട്ടിയ ശേഷം തൊട്ടടുത്ത ഉണക്കമീന് കടയില് സാധനം വാങ്ങാന് നില്ക്കുകയായിരുന്നു. അമിത വേഗതയില് സ്റ്റേഡിയം ഭാഗത്ത് നിന്നു വന്ന കാറാണ് ദമ്പതികളെ ഇടിച്ചത്. ശാന്തയെ തൊട്ടടുത്തിരുന്ന സ്കൂട്ടറില് ചേര്ത്തു വച്ച് ഇടിച്ച ശേഷം കാര് മരിത്തിലിടിച്ച് നിന്നു.
ശാന്തയുടെ കാലിന്റെ ഒരുഭാഗം അറ്റുപോയി. അരയുടെ താഴ്ഭാഗം തകര്ന്നു. ഇരുവരെയും പത്തനംതിട്ട ജനറല് ആശുപത്രയില് എത്തിച്ച ശേഷം തിരുവല്ല സ്വകാര്യ ആശുപത്രിയിലേക്ക് കൊണ്ടുപോകും വഴിയാണ് ശാന്ത മരിച്ചത്. സത്യന് പരുക്കുകളോടെ ചികിത്സയിലാണ്. കാറോടിച്ചിരുന്ന യുവാക്കള് രക്ഷപെട്ടു. കാറിനുള്ളില് നിന്ന് മദ്യക്കുപ്പി കണ്ടെത്തിയിട്ടുണ്ട്. ഡിവൈ.എസ്.പി കെ. സജീവ് അടക്കമുള്ളവര് സ്ഥലത്ത് വന്ന് കാറിനകം പരിശോധിച്ചു. ഇതിന്റെ ഡാഷ് ബോര്ഡിലാണ് മദ്യക്കുപ്പി ഉണ്ടായിരുന്നതെന്ന് ദൃക്സാക്ഷികള് പറഞ്ഞു. മലയാലപ്പുഴ കിഴക്കുപുറം സ്വദേശികളാണ് കാറിലുണ്ടായിരുന്നത് എന്ന് പറയുന്നു.
