കൊല്ലം : പരാതിക്കാരനെ മര്ദിച്ച പോലീസുകാരനെ സംരക്ഷിക്കാന് മനുഷ്യാവകാശ കമ്മീഷന് തെറ്റായ റിപ്പോര്ട്ട് നല്കിയ കൊല്ലം റൂറല് എസ്പി വിവാദത്തില്.തെന്മലയിലാണ് സംഭവം. സിഐയെ സംരക്ഷിക്കാനാണ് തെറ്റായ റിപ്പോര്ട്ട് നല്കിയത്. കഴിഞ്ഞ വര്ഷം ഫെബ്രുവരിയിലാണ് പരാതി നല്കാനെത്തിയ തെന്മല സ്വദേശി രാജിവിനെ സിഐ വിശ്വംഭരന് മര്ദിച്ചത്. തുടര്ന്ന് സ്റ്റേഷന് പുറത്ത് കെട്ടിയിടുകയും ചെയ്തു. കേസില് ഹൈക്കോടതി ഇടപെടലിനെ തുടര്ന്ന് വിശ്വംഭരനെ സസ്പെന്ഡ് ചെയ്തിരുന്നു.
കേസില് മനുഷ്യാവകാശ കമ്മീഷന് ഇടപെട്ട് റിപ്പോര്ട്ട് നല്കാന് ആവശ്യപ്പെട്ടു. തുടര്ന്ന് നടത്തിയ അന്വേഷണത്തില് സിഐയുടെയും എസ്ഐ ശാലുവിന്റെയും ഭാഗത്ത് നിന്നും കൃത്യവിലോപമുണ്ടായെന്ന് ചൂണ്ടിക്കാട്ടി കൊല്ലം ഡിസിആര്ബി ഡിവൈഎസ്പി റിപ്പോര്ട്ട് സമര്പ്പിച്ചു. എന്നാല് ഈ റിപ്പോര്ട്ട് പൂഴ്ത്തിയ റൂറല് എസ്പി, പരാതിക്കാരന് പോലീസുകാരെ മര്ദിച്ചെന്ന രീതിയിലാണ് മനുഷ്യാവകാശ കമ്മീഷന് റിപ്പോര്ട്ട് നല്കിയത്. റിപ്പോര്ട്ടില് തിരിമറി നടന്നതായി മനുഷ്യാവകാശ കമ്മീഷന് കണ്ടെത്തി. ഇതേതുടര്ന്നാണ് റൂറല് എസ്പിക്കെതിരെ അന്വേഷണത്തിന് ഉത്തരവിട്ടത്. തിരുവനന്തപുരം റേഞ്ച് ഡിഐജിയാണ് അന്വേഷണം തുടങ്ങിയത്.
