മുണ്ടക്കയം : കൊല്ലം-തേനി ദേശീയപാതയിൽ കൊടുകുത്തിക്ക് സമീപം ചാമപ്പാറ വളവിൽ തമിഴ്നാട്ടിൽനിന്നെത്തിയ ശബരിമല തീർഥാടകരുടെ വാഹനം മറിഞ്ഞ് ഏഴുപേർക്ക് പരിക്ക്. പരിക്കേറ്റ ചെന്നൈ സ്വദേശികളായ രാജേഷ് (35), പ്രജത് (15), ലളിത് (30), ദീപക് (26), ആർ. ശിവ (32), കാർത്തിക് (30) എന്നിവരെ മുണ്ടക്കയം മെഡിക്കൽ ട്രസ്റ്റ് ആശുപത്രിയിലും സാരമായി പരിക്കേറ്റ അയ്യാദുരൈ (29), ഗണേശ് (30) എന്നിവരെ കോട്ടയം മെഡിക്കൽ കോളജിലും പ്രവേശിപ്പിച്ചു.
ഇതിനിടെ കൊടുകുത്തിയിൽ അപകടത്തിൽപെട്ട ശബരിമല തീർഥാടകരുടെ വാഹനം ഉയർത്താനെത്തിയ അഗ്നിശമന സേനയുടെ വാഹനം പെരുവന്താനത്തിനു സമീപം കാറുകളിലിടിച്ച് യാത്രക്കാർക്ക് നിസ്സാര പരിക്കേറ്റു. അപകടങ്ങളെ തുടർന്ന് ഏറെസമയം ഗതാഗതം തടസ്സപ്പെട്ടു.