തിരുവനന്തപുരം : ശബരിമലയില്‍ മാസപൂജയ്ക്ക് പതിനായിരം ഭക്തര്‍ക്ക് ദര്‍ശനാനുമതി നല്‍കുമെന്ന് മുഖ്യമന്ത്രി. എ, ബി, കാറ്റഗറി മേഖലകളില്‍ നിയന്ത്രണങ്ങള്‍ക്ക് വിധേയമായി സിനിമാഷൂട്ടിങ്ങിനും അനുമതി നല്‍കി. എന്നാല്‍ വ്യാപാരികളെ പൂര്‍ണ്ണമായി അവഗണിച്ചതാണ് പ്രഖ്യാപനങ്ങള്‍.
ബക്രീദ് പ്രമാണിച്ച് ട്രിപ്പിള്‍ ലോക്ഡൗണ്‍ ഉള്ള പ്രദേശങ്ങളില്‍ തിങ്കളാഴ്ച കടകള്‍ തുറക്കാം. ആ പ്രദേശങ്ങളില്‍ ഇലക്ട്രോണിക് ഷോപ്പുകളും റിപ്പയര്‍ ഷോപ്പുകളും തിങ്കള്‍ മുതല്‍ വെള്ളിവരെ തുറക്കാം. ആരാധനാലയങ്ങളില്‍ വിശേഷദിവസങ്ങളില്‍ 40 പേര്‍ക്ക് പ്രവേശനം അനുവദിക്കും. ഒരു ഡോസ് വാക്‌സീന്‍ എടുത്തവര്‍ക്കാണ് ആരാധനാലയങ്ങളില്‍ പ്രവേശനാനുമതി. ആ പ്രദേശങ്ങളില്‍ മുടിവെട്ടാന്‍ ബ്യൂട്ടി പാര്‍ലറുകളും ബാര്‍ബര്‍ ഷോപ്പുകളും തുറക്കാം.
ഡിജിറ്റല്‍ പഠനോപകരണങ്ങളില്ലാത്ത കുട്ടികളുടെ കണക്കെടുക്കുമെന്ന് മുഖ്യമന്ത്രി. ആദിവാസി കുട്ടികള്‍ക്കാണ് മുന്‍ഗണന. ഊരുകളിലെ പഠനമുറികള്‍ ഉപയോഗിക്കും. തിരിച്ചടയ്ക്കാന്‍ ശേഷിയുള്ളവര്‍ക്ക് ടാബ്/ലാപ്‌ടോപ് വാങ്ങാന്‍ പലിശരഹിതവായ്പ അനുവദിക്കും. സാമ്പത്തികശേഷിയുള്ളവര്‍ ദരിദ്രരായ കുട്ടികളെ സഹായിക്കണമെന്ന് മുഖ്യമന്ത്രി പറഞ്ഞു. സംഭാവനകള്‍ നല്‍കാന്‍ ചീഫ് മിനിസ്റ്റേഴ്‌സ് എജ്യുക്കേഷണല്‍ എംപവര്‍മെന്റ് ഫണ്ട് രൂപീകരിക്കുമെന്നും മുഖ്യമന്ത്രി.
സ്ത്രീസുരക്ഷയ്ക്കായി പിങ്ക് ബീറ്റ്. ഗാര്‍ഹികപീഡനങ്ങള്‍ പരാതി കിട്ടുംമുന്‍പ് അന്വേഷിച്ചറിയാന്‍ പിങ്ക് ജനമൈത്രി ബീറ്റ്. ബസുകള്‍, സ്‌കൂളുകള്‍, കോളജുകള്‍, ബസ് സ്റ്റോപ്പുകള്‍ എന്നിവിടങ്ങളിലും നിരീക്ഷണം. വനിതാ പോലീസ് ഉദ്യോഗസ്ഥര്‍ മാത്രമുള്‍പ്പെട്ട പിങ്ക് റോമിയോ ബീറ്റ് തിങ്കളാഴ്ച മുതല്‍ പ്രവര്‍ത്തനം ആരംഭിക്കും.
