വടശേരിക്കര : ബ്ലോക്ക് പഞ്ചായത്ത് അടുത്തിടെ പണിത ശുചിമുറി സമുച്ചയത്തിനു പുറമേ ശബരിമല തീർത്ഥാടകർക്കായി ഇടത്താവളത്തിൽ ജില്ലാ ഭരണകൂടം ഒരു ശുചിമുറി സമുച്ചയം കൂടി നിർമിക്കുന്നു. 10 ശുചിമുറികളുള്ള പുതിയ സമുച്ചയം പൂർത്തിയാകുന്നതോടെ സമുച്ചയങ്ങളുടെ എണ്ണം നാലാകും. വടശേരിക്കര പാലത്തോടു ചേർന്ന് പഞ്ചായത്തും ഡിടിപിസിയും ശുചിമുറി സമുച്ചയം പണിതിട്ടുണ്ട്.
ഇതിൽ പഞ്ചായത്തിന്റേത് പ്രവർത്തന സജ്ജമാണ്. ഡിടിപിസിയുടേതിൽ അറ്റകുറ്റപ്പണി നടത്തിയിട്ടില്ല. സെപ്റ്റിക് ടാങ്ക് ഇടയ്ക്കിടെ പൊട്ടുന്നതു പതിവാണ്. പഞ്ചായത്ത് കമ്യൂണിറ്റി ഹാളിനു പിന്നിലാണ് 10 ലക്ഷം രൂപ ചെലവിൽ 10 ശുചിമുറികളുള്ള സമുച്ചയം പണിതത്. ഇതോടു ചേർന്ന് ഡിടിപിസിയുടെ സ്ഥലത്താണ് ജില്ലാ ഭരണകൂടം പുതിയത് നിർമിക്കുന്നത്. നിർമിതിക്കാണ് നിർമാണ ചുമതല.
