ശബരിമല : നിറപുത്തരി പൂജകള്ക്കായി ശബരിമല ക്ഷേത്രം ശനിയാഴ്ച വൈകുന്നേരം 5 മണിക്ക് തുറക്കും. തന്ത്രി കണ്ഠരര് മഹേഷ് മോഹനരുടെ മുഖ്യകാര്മ്മികത്വത്തില് ക്ഷേത്രമേല്ശാന്തി എ.കെ.സുധീര് നമ്പൂതിരിയാണ് ക്ഷേത്രശ്രീകോവില് നടതുറന്ന് ദീപങ്ങള് തെളിയിക്കുന്നത്.
നട തുറക്കുന്ന ദിവസമായ ശനിയാഴ്ച പ്രത്യേക പൂജകള് ഒന്നുംതന്നെ ഉണ്ടാവില്ല. നിറപുത്തരി പൂജക്കായി ക്ഷേത്രനട 9 ന് പുലര്ച്ചെ 4 മണിക്ക് തുറക്കും. തുടര്ന്ന് നിര്മ്മാല്യ ദര്ശനവും അഭിഷേകവും നടക്കും. അതിനുശേഷം മഹാഗണപതിഹോമം. പിന്നീട് മണ്ഡപത്തില് പൂജചെയ്ത് വെച്ചിരിക്കുന്ന നെല്ക്കതിരുകള് ശ്രീകോവിലിനുള്ളിലേക്ക് പൂജയ്ക്കായി എടുക്കും. 5.50നും 6.20 നും മദ്ധ്യേയുള്ള മുഹൂര്ത്തത്തില് നിറപുത്തരിപൂജ നടക്കും. തുടര്ന്ന് തന്ത്രി കണ്ഠരര് മഹേഷ് മോഹനര് ശ്രീകോവിലില് പൂജിച്ച നെല്ക്കതിരുകള് വിതരണം ചെയ്യും. ഇക്കുറി നിറപുത്തരിപൂജ ചടങ്ങുകള് മാത്രമായിട്ടാണ് നടത്തുന്നത്. ശബരിമലയില് കൃഷിചെയ്ത കരനെല് കതിരുകളും ദേവസ്വം ബോര്ഡ് മറ്റിടങ്ങളില് നിന്ന് എത്തിക്കുന്ന നെല്കതിരുകളും കലിയുഗവരദന് പൂജയ്ക്കായി സമര്പ്പിക്കും. ശേഷം 7.30 ന് ഉഷപൂജ. 9.30 ന് ഉച്ചപൂജ കഴിഞ്ഞ് 10 മണിക്ക് നട അടയ്ക്കും. വൈകുന്നേരം 5 മണിക്കാണ് വീണ്ടും നട തുറക്കുക. 6.30 ന് ദീപാരാധന.7.20ന് അത്താഴപൂജ. 7.30 ന് ഹരിവരാസനം പാടി ശ്രീകോവില് നടഅടയ്ക്കും.
പിന്നീട് ചിങ്ങമാസ പൂജകള്ക്കായി ശബരിമല നട തുറക്കുന്നത് ആഗസ്റ്റ് 16 ന് വൈകുന്നേരം ആയിരിക്കും.17 ന് ആണ് ചിങ്ങം ഒന്ന്. ധാരണ പ്രകാരം അന്നുമുതല് അടുത്ത ഒരുവര്ഷത്തേക്കുള്ള താന്ത്രിക ചുമതല മുതിര്ന്ന തന്ത്രി കണ്ഠരര് രാജീവരര്ക്കാണ്.
