റാന്നി : പത്തനംതിട്ട ളാഹയിൽ ശബരിമല തീർഥാടകരുടെ വാഹനം മറിഞ്ഞുണ്ടായ അപകടത്തില്‍ പരിക്കേറ്റ കുട്ടി മരിച്ചു. എട്ടു വയസ്സുകാരന്‍ മണികണ്ഠന്‍ ആണ് മരിച്ചത്. അപകടത്തില്‍പ്പെട്ട മണികണ്ഠൻ ഗുരുതര നിലയിൽ വെന്റിലേറ്ററിൽ ആയിരുന്നു. കുട്ടിയുടെ അന്തരികാവയവങ്ങൾക്ക് ഗുരുതര പരുക്കുകളും ഏറ്റിരുന്നു. കരളിന് ക്ഷതവും നട്ടെല്ലിനും പരുക്കും സംഭവിച്ചിരുന്നു.
ളാഹയ്ക്ക് സമീപം ആന്ധ്രയില്‍ നിന്ന് ഇന്ന് രാവിലെ എത്തിയ ശബരിമല തീര്‍ഥാടകരുടെ ബസാണ് അപകടത്തില്‍പ്പെട്ടത്. അപകടത്തില്‍പ്പെട്ട 44 തീര്‍ഥാടകരെയും ആശുപത്രിയിലേക്കു മാറ്റിയിരുന്നു. അതില്‍ രണ്ട് പേരെ കോട്ടയം മെഡിക്കല്‍ കോളേജിലേക്കും മാറ്റിയിരുന്നു. 18 പേരെ പത്തനംതിട്ട ജനറല്‍ ആശുപത്രിയിലേക്കും ബാക്കി ഉള്ളവരെ പെരുനാട് കമ്യൂണിറ്റി ഹെല്‍ത്ത് സെന്ററിലേക്കും മാറ്റിയിരുന്നു.
