തിരുവനന്തപുരം : മണ്ഡലകാലം തിങ്കളാഴ്ച ആരംഭിക്കാനിരിക്കെ ശബരിമലയില്‍ ഒരേ സമയം നാല് എസ്പിമാരുടെ നേതൃത്വത്തില്‍ സുരക്ഷാ ക്രമീകരണം ഒരുക്കും. മണ്ഡല- മകര വിളക്കു കാലത്തു നാലു ഘട്ടമായാണ് പോലീസ് ക്രമീകരണം. ദക്ഷിണ മേഖലാ ഐജിയും റേഞ്ച് ഡിഐജിയും മേല്‍നോട്ടം വഹിക്കും. കോവിഡ് കാലത്തു കര്‍ശന നിയന്ത്രണങ്ങളോടെയാണ് ഇത്തവണത്തെ ശബരിമല ദര്‍ശന ക്രമീകരണം ഒരുക്കുക.
ഞായറാഴ്ച മുതല്‍ നവംബര്‍ 30 വരെയുള്ള ആദ്യ ഘട്ടത്തില്‍ എസ്പിമാരായ ആര്‍. സുകേശന്‍, ബി. കൃഷ്ണകുമാര്‍ എന്നിവര്‍ക്കാണ് സന്നിധാനത്തു ചുമതല. കെ.എം. സാബു മാത്യു, കെ.എല്‍. ജോണ്‍കുട്ടി എന്നിവര്‍ക്കു പമ്പയുടെ ചുമതല നല്‍കി.ഡിസംബര്‍ ഒന്നു മുതല്‍ 15 വരെയുള്ള രണ്ടാംഘട്ടത്തില്‍ ബി.കെ. പ്രശാന്തന്‍ കാണി, കെ.എസ്. സുദര്‍ശനന്‍ എന്നിവര്‍ക്കു സന്നിധാനത്തിന്റെയും കെ.കെ. അജി, എ. ഷാനവാസ് എന്നിവര്‍ക്കു പമ്പയുടെയും ചുമതലയുണ്ടാകും.
ഡിസംബര്‍ 16 മുതല്‍ 31 വരെയുള്ള മൂന്നാഘട്ടത്തില്‍ എ.എസ്. രാജു, കെ.വി. സന്തോഷ് എന്നിവര്‍ക്കു സന്നിധാനത്തിന്റെയും എം.സി. ദേവസ്യ, എസ്. ദേവമനോഹര്‍ എന്നിവര്‍ക്കു പമ്പയുടെയും ചുമതലയുണ്ടാകും. അവസാന ഘട്ടത്തില്‍ എസ്. നവനീത് ശര്‍മ, ഇ.എസ്. ബിജിമോന്‍, വി. അജിത്ത് എന്നിവര്‍ക്കു സന്നിധാനത്തേയും കെ. രാധാകൃഷ്ണന്‍, ജോസി ചെറിയാന്‍ എന്നിവര്‍ക്കു പമ്പയിലേയും ചുമതല നല്‍കി സംസ്ഥാന പോലീസ് മേധാവി ഉത്തരവിറക്കി.
