ശബരിമല : വനഭൂമിയും മരങ്ങളും പരമാവധി സംരക്ഷിച്ച് റോപ് വേ പദ്ധതിയുടെ അന്തിമരൂപരേഖ തയ്യാറാക്കാൻ വനംവകുപ്പിന്റെ പ്രിൻസിപ്പൽ ചീഫ് കൺസർവേറ്റർ ചന്ദ്രശേഖർ നിർദ്ദേശിച്ചു. റോപ് വേ സംബന്ധിച്ച് കേന്ദ്ര അനുമതിക്ക് അപേക്ഷ നൽകുന്നതിന് മുന്നോടിയായി പദ്ധതിപ്രദേശം സന്ദർശിച്ച ശേഷമാണ് ചന്ദ്രശേഖർ ഈ നിർദ്ദേശം വെച്ചത്. കേന്ദ്ര ഉദ്യോഗസ്ഥർക്ക് മുൻപാകെ പദ്ധതിയെപ്പറ്റി വിശദീകരിക്കേണ്ടതും പ്രിൻസിപ്പൽ ചീഫ് കൺസർവേറ്ററാണ്. ദേവസ്വം ബോർഡ് അംഗങ്ങളുമായും ഉദ്യോഗസ്ഥരുമായും ചർച്ച നടത്തിയ ശേഷമാണ് അദ്ദേഹം പദ്ധതി പ്രദേശം സന്ദർശിച്ചത്.
ബോർഡ് അംഗം അഡ്വ.എ.അജികുമാർ, എക്സിക്യൂട്ടീവ് എൻജിനിയർ ശ്യാമപ്രസാദ്, പ്രോട്ടോകോൾ ഓഫീസർ ഹരി നായർ, എ.ഇ നിഥിൻ, പെരിയാർ ടൈഗർ റിസർവ് ഡപ്യൂട്ടി ഡയറക്ടർ സന്ദീപ് നായർ , റാന്നി ഡി.എഫ്.ഒ രാജേഷ്, റേഞ്ച് ഓഫീസർ അശോക്, റോപ് വേ നിർമ്മാണ കമ്പിനിയുടെ ഓപ്പറേഷൻസ് ഹെഡ് ഉമാനായർ എന്നിവർ കാര്യങ്ങൾ വിശദീകരിച്ചു.
