തിരുവനന്തപുരം : കഴിഞ്ഞ ദിവസം ജീവനൊടുക്കിയ കൊച്ചി മാല്യങ്കര കോഴിക്കല് വീട്ടില് മത്സ്യത്തൊഴിലാളി സജീവനു സര്ക്കാര് പ്രഖ്യാപിച്ച ഭൂമി തരംമാറ്റത്തിനുള്ള ഫീസ് സൗജന്യം ലഭിച്ചില്ലെന്ന് എറണാകുളം ജില്ലാ കലക്ടറുടെ പ്രാഥമികാന്വേഷണ റിപ്പോര്ട്ട്. കഴിഞ്ഞ എല്ഡിഎഫ് സര്ക്കാരിന്റെ അവസാനകാലത്ത് 25 സെന്റ് വരെയുള്ള ഭൂമി തരംമാറ്റത്തിനു പ്രഖ്യാപിച്ച ഫീസ് സൗജന്യമാണ് നിയമത്തിന്റെയും ഫയലിന്റെയും നൂലാമാലകള്ക്കിടയില്പെട്ടു വെറും നാലു സെന്റിന്റെ ഉടമയ്ക്കു നഷ്ടമായത്.
ഭൂമി തരംമാറ്റം അനുവദിക്കുന്നതിനു മുന്നോടിയായി 32,400 രൂപ ഫീസ് അടയ്ക്കാന് ഫോര്ട്ട് കൊച്ചി റവന്യു ഡിവിഷനല് ഓഫിസില്നിന്ന് ഒക്ടോബറില് സജീവന് നോട്ടിസ് ലഭിച്ചിരുന്നു. ഈ പണം അദ്ദേഹം അടച്ചില്ല. 25 സെന്റിനു താഴെയുള്ള ഭൂമിക്കു ഫീസ് സൗജന്യമാക്കിയത് അറിഞ്ഞ് സജീവന് പുതിയ അപേക്ഷ സമര്പ്പിക്കുകയായിരുന്നെന്നും ഈ അപേക്ഷ മുന്ഗണനാക്രമപ്രകാരം പരിഗണിക്കാനിരിക്കുന്നതേ ഉള്ളു എന്നും റിപ്പോര്ട്ടില് പറഞ്ഞു. ഫോര്ട്ട് കൊച്ചി സബ് കലക്ടര് നല്കിയ വിവരങ്ങളുടെ അടിസ്ഥാനത്തില് കലക്ടര് തയാറാക്കിയ റിപ്പോര്ട്ട് റവന്യു വകുപ്പിന് ഇന്നലെ സമര്പ്പിച്ചു.
