പത്തനംതിട്ട : ഗുണനിലവാരമില്ലാത്ത പാത്രങ്ങളുടെ വില്പന പത്തനംതിട്ടയിലും വ്യാപകം. നഗരത്തിലെ സ്വകാര്യ ബസ് സ്റ്റാന്റ് പരിസരത്ത് ഇത്തരത്തിലുള്ള പാത്രങ്ങളുടെ കച്ചവടം വര്ധിക്കുകയാണ്. യാതൊരു ഗുണനിലവാരവുമില്ലാത്ത പാത്രങ്ങളാണ് ഇതെന്നാണ് വാങ്ങി ഉപയോഗിച്ചവര് പറയുന്നത്. കഴിഞ്ഞ ഒരു മാസത്തിലധികമായി ഇത്തരം പാത്രങ്ങള് നഗരത്തില് വില്ക്കുന്നുണ്ട്. മുന്പ് കൊല്ലം നഗരത്തില് ഇത്തരത്തില് പാത്രങ്ങള് അനധികൃതമായി വിറ്റഴിച്ചതിനെതിരെ കൊല്ലം നഗരസഭ കര്ശന നടപടികള് സ്വീകരിക്കുകയും പാത്രങ്ങള് പിടിച്ചെടുക്കുകയും ചെയ്തിരുന്നു.
ഈ പാത്രങ്ങള് ഗ്യാസ് അടുപ്പില് ചൂടാകുമ്പോള് പുക ഉയരുകയും ഇതിനുള്ളിലെ ആവരണം കത്തിപോകുന്നതായും പരാതിയുണ്ട്. ഇത് ക്യാന്സര് അടക്കമുള്ള മാരക രോഗങ്ങള്ക്ക് കാരണമാകുമെന്നാണ് പൊതു ജനങ്ങള് പറയുന്നത്. ഇതര സംസ്ഥാനക്കാരാണ് ഇത്തരത്തില് പാത്രങ്ങള് വില്ക്കുന്നവരില് ഏറെയും. ജില്ലയുടെ പല ഭാഗങ്ങളിലും ഇത്തരം പാത്രങ്ങളുടെ അനധികൃത കച്ചവടം സജ്ജീവമായി തുടരുമ്പോഴും ആരോഗ്യ വകുപ്പും നടപടികള് സ്വീകരിക്കുന്നില്ല എന്നാണ് ആക്ഷേപമുയരുന്നത്. ഗുണനിലവാര മുദ്രകള് പോലുമില്ലാത്ത ഇത്തരം പാത്രങ്ങള് വളരെ കുറഞ്ഞ വിലയിലാണ് വില്ക്കുന്നത്. ഇത്തരക്കാര്ക്ക് എതിരെ കര്ശന നടപടി സ്വീകരിക്കണമെന്നാണ് പൊതുജനങ്ങള് ആവശ്യപ്പെടുന്നത്.
